ឃើញជាក់ស្ដែង មនុស្សស្រីជាច្រើនតែងតែជួបរឿងស្នេហាបរាជ័យ អ្វីដែលសំខាន់គឺ សុទ្ធតែជាមនុស្សស្រីដែលល្អទាំងចិត្តគំនិត និងរូបសម្រស់ក៏មិនអន់ដែរ ប៉ុន្តែហេតុអ្វីបានជានាងចេះតែជួបមនុស្សដែលមិនល្អ ធ្វើឱ្យនាងខូចចិត្តម្ដងហើយម្ដងទៀត រហូតដល់ថ្នាក់មនុស្សស្រីខ្លះ ប្រែក្លាយខ្លួនឯងពីទន្សាយទៅជាខ្លា ជាមនុស្សដែលលែងមានភាពទន់ភ្លន់ ទៅជាមនុស្សដែលមានតែអារម្មណ៍ស្ងប់ស្ងាត់ និងចិត្តដាច់ទៅវិញ។
ជាការពិតណាស់ រាល់ការឈឺចាប់ ខូចចិត្ត និងខកបំណងទាំងអស់ គឺសុទ្ធតែកើតឡើងពីពាក្យថា ជឿជាក់ពេក ទុកចិត្តពេក និងរំពឹងខ្លាំងពេក។ មូលហេតុចម្បងដែលធ្វើឱ្យមនុស្សស្រីជួបរឿងខកបំណង និងការឈឺចាប់ក្នុងរឿងស្នេហា គឺកើតពីមនុស្សស្រីខ្លួនឯង ដោយរំពឹងខ្ពស់លើមនុស្សម្នាក់នោះ ជឿជាក់ និងទុកចិត្តគេរហូតដល់លែងខ្វល់ពីអារម្មណ៍របស់ខ្លួនឯង។ មនុស្សស្រីឱ្យតែនាងដាក់ចិត្តស្រឡាញ់នរណាម្នាក់ គឺនាងលះបង់អស់ហើយ គ្មានសល់សូម្បីតែបន្តិចទុកសម្រាប់ខ្លួនឯង ជាក់ស្ដែងគឺនាងរំពឹងទាំងស្រុងទៅលើពាក្យសម្ដី ជាពិសេសគឺ ពាក្យសន្យា ដោយមិនគិតថាវាជាពាក្យពិត ឬក្លែងក្លាយនោះឡើយ។
មនុស្សស្រីដែលតែងតែខូចចិត្ត ឈឺចាប់ ខកបំណងនៅក្នុងរឿងស្នេហា គឺសុទ្ធតែជាមនុស្សល្អៗ ចិត្តល្អក៏ព្រោះតែភាពល្អរបស់នាងនេះហើយ ដែលធ្វើឱ្យនាងមានគំនិតវិជ្ជមាន និងគិតល្អជានិច្ចលើមនុស្សដែលខ្លួនស្រឡាញ់ ទុកចិត្តគេរហូតដល់ភ្លេចមើលថែ និងការពារខ្លួនឯង នាងល្អពេល សុទិដ្ឋិនិយមពេក ទើបវាក្លាយទៅជាការភ្លេចភ្លាំង និងប្រុងប្រយ័ត្នចំពោះទង្វើល្អក្លែងក្លាយ ពាក្យសន្យាដើម្បីធ្វើឱ្យនាងស្ងប់ចិត្តមួយពេលតែប៉ុណ្ណោះ។
មនុស្សស្រីស្ទើរតែទាំងអស់ហើយ ដែលតែងតែរងគ្រោះព្រោះតែពាក្យសម្ដីផ្អែមល្ហែម លួងលោម និងសន្យានេះសន្យានោះ មនុស្សស្រីរងគ្រោះព្រោះតែនាងចិត្តទន់ ចេះតែអត់ឱន លើកលែង អភ័យទោស ព្រោះតែនាងជាមនុស្សល្អបែបហ្នឹងហើយ ទើបធ្វើឱ្យមនុស្សប្រុសដែលមានគំនិតមិនល្អ ឬក៏ចូលក្នុងជីវិតនាងដើម្បីតែលេងសើចមួយពេលនោះ មានឱកាសចូលមកធ្វើបាបចិត្តនាងដូច្នេះ៕
ខ្មែរឡូតសូមរក្សាសិទ្ធិ
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្រលោមលោក & អប់រំ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
