រដ្ឋមន្ត្រីសុខាភិបាល អំពាវនាវឱ្យម្ចាស់កម្មវិធីចាំបាច់ ធ្វើតេស្តរហ័សលើអ្នកចូលរួម និងការពិនិត្យកាតចាក់វ៉ាក់សាំង

ភ្នំពេញ៖ ស្របពេលដែលចំនួនករណីឆ្លងនៃវីរុសអូមីក្រុងនៅក្នុងប្រទេសកម្ពុជា ក្នុងរយៈពេលប៉ុន្មានថ្ងៃនេះ នៅតែបន្តកើនឡើងជាលំដាប់ ក្នុងនោះ គិតត្រឹមថ្ងៃទី២០ ខែកុម្ភៈ ឆ្នាំ ២០២២នេះ តាមការប្រកាសរបស់ក្រសួងសុខាភិបាល ប្រទេសកម្ពុជា បានរកឃើញករណីឆ្លងវីរុសអូមីក្រុងថ្មីចំនួន ៤៨៨ ករណី ដោយចំនួន សរុបករណីអូមីក្រុងក្នុងសហគមន៍ ចំនួន ៥,៨០៦ ករណី។​  

ជាមួយគ្នានេះដែរ បើតាមសេចក្តីណែនាំរបស់ក្រសួងសុខាភិបាល ចុះថ្ងៃទី២០ ខែកុម្ភៈ ឆ្នាំ២០២២នេះ ក្រសួង បានអំពាវនាវដោយក្រើនរំលឹកដល់ម្តងហើយម្តងទៀត ដល់ម្ចាស់កម្មវិធីគ្រប់ប្រភេទ ទាំងរៀបអាពាហ៍ពិពាហ៍ និងកម្មវិធីផ្សេងៗ ត្រូវកាត់បន្ថយចំនួនមនុស្សចូលរួម ដោយម្ចាស់កម្មវិធី ត្រូវរៀបចំឱ្យមានការពិនិត្យបណ្ណចាក់វ៉ាក់សាំងកូវីដ១៩ និងយកសំណាកធ្វើតេស្តអ្នកដែលពុំទាន់បានធ្វើ តេស្តរហ័ស មុនអនុញ្ញាតឱ្យចូលរួមក្នុងកម្មវិធី។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឯកឧត្តម ម៉​ម ប៊ុ​ន​ហេង រដ្ឋមន្ត្រី​ក្រសួងសុខាភិបាល បាន​បញ្ជាក់​នៅ​ក្នុង​សេចក្តីណែនាំ​បន្ថែម ស្តី​ពី​ការ ពង្រឹង ការ​អនុ​វ​ត្ត វិធានការ សុខាភិបាល ក្នុង​ការ​ប្រយុទ្ធ និង​ទប់ស្កាត់​ការ​ឆ្លង​រាលដាល​នៃ​វីរុស​កូ​វី​ដ​-១៩ ជា​ពិសេស «​អូ​មី​ក្រុង» នៅ​ក្នុង​សហគមន៍​ថា៖

• ​សម្រាប់​ការ​ជួបជុំ​ដែល​មាន​មនុស្ស​ម្នា​ច្រើន​កុះករ លើកទឹកចិត្ត​ដល់​ប្រជាជន​ទូទៅ និង​​អ្នក​រៀបចំ​ការ​ជួបជុំ​មនុស្ស ឬ​សកម្មភាព​សង្គម​ដទៃ​ទៀត មាន​ជា​អាទិ៍ កម្មវិធីសាសនា កម្មវិធី​ប្រពៃណី ឬ​កម្ម​វិធី​អាពាហ៍ពិពាហ៍ កម្មវិធី​កីឡា ឬ​កម្មវិធី​កំសាន្ត​ប្រមូលផ្តុំ​នានា

• លើកទឹកចិត្ត ឱ្យធ្វើ​ការ​កាត់​​បន្ថយ​ចំនួន​អ្នកចូលរួម​ក្នុង​កម្មវិធី​ទាំងនេះ ឱ្យ​នៅ​កម្រិត​អប្បបរមា ដើម្បី​ធានា​បាន នូវ​ការ​អនុវត្តន៍​វិធាន​គម្លាត​សុវត្ថិភាព​បុគ្គល និង​សង្គម ក្នុង​បរិយាកាស​ដែល​មាន​រំហូរ​ខ្យល់​ចេញចូល​គ្រប់គ្រាន់ ស្រប​តាម​ស្ថានភាព​ជាក់​ស្តែង​នៃ​ទីតាំង​កម្មវិធី​នីមួយ​ៗ និង​រក្សា​បាន​នូវ​អនាម័យ​ដៃ និង​ផ្លូវដង្ហើម​បាន​ត្រឹមត្រូវ​។

• លើកទឹកចិត្ត​ដល់​អ្នក​រៀបចំ​កម្មវិធី និង​អ្នកចូលរួម​ទាំងអស់ ធ្វើតេស្ត​រហ័ស​រក​អង់​ទី​ហ្សែ​ន​កូ​វី​ដ​-១៩ ដោយ​ខ្លួន​ឯង មុន​នឹង​ទៅ​ចូលរួម​កម្មវិធី​ជួបជុំ​ក្នុង​កម្រិត​អប្បបរមា​ណាមួយ និង​មិន​ត្រូវ​ទៅ​ចូលរួម​កម្មវិធី​ណាមួយ​នោះ ក្នុង ករណី​ដែល​បុគ្គល​ខ្លួនឯង​មិន​មាន​សុវត្ថិភាព ឬ​មាន​រោគ​សញ្ញា សង្ស័យ​ជំងឺ​កូ​វី​ដ​-១៩។

លើសពីនេះ រដ្ឋមន្ត្រី​ក្រសួងសុខាភិបាល ឯកឧត្តម​ ម៉ម ប៊ុនហេង ​បានបញ្ជាក់ទៀតថា៖ «​ម្ចាស់​កម្មវិធី​ត្រូវ​ចាត់ចែង​ឱ្យ​មានការ​ពិនិត្យ​លើ​បណ្ណ​ចាក់​វ៉ាក់សាំង​កូ​វី​ដ​-១៩ និង​យក​សំណាក​ធ្វើតេស្ត​អ្នក​ដែល​ពុំ​ទាន់​បាន​ធ្វើ តេស្ត​រហ័ស មុន​អនុញ្ញាត​ឱ្យ​ចូលរួម​កម្មវិធី ដោយ​ត្រូវ​រៀបចំ​ក្រុមការងារ​ដែល​មាន​សុខភាព​ល្អ ចេះ​ធ្វើតេស្ត​រហ័ស​រក​អង់​ទី​ហ្សែ​ន កូ​វី​ដ​-១៩ ធ្វើការ​យក​វត្ថុ​សំណាក​ធ្វើតេស្ត ដោយ​អនុវត្ត​ទៅ​តាម​ការ​ណែនាំ​ពី​របៀប​ធ្វើតេស្ត​ទៅ​តាម​ប្រភេទ​តេស្ត​រហ័ស​នីមួយ​ៗ ដោយ​ត្រូវ​ប្រើប្រាស់​តែ​ឧបករណ៍​តេស្ត​ដែល​មានការ​ទទួលស្គាល់​ពី​ក្រសួងសុខាភិបាល ព្រមទាំង​ត្រូវ​វេច​ខ្ចប់​កាក​សំណល់​ដែល បាន​ធ្វើតេស្ត​រហ័ស​រួច ឱ្យ​បាន​ត្រឹមត្រូវ និង​មាន​សុវត្ថិភាព​មុន​នឹង​យក​ទៅ​កំទេច​ចោល​» ។

ក្នុងនោះ តាមសេចក្តីណែនាំរបស់រដ្ឋមន្ត្រីសុខាភិបាល ឯកឧត្តម ម៉ម ប៊ុនហេង បានសង្កត់ធ្ងន់ថា៖ «បុគ្គល​ដែល​ត្រូវ​បាន​រក​ឃើញ​វិជ្ជមាន កូ​វី​ដ​-១៩ ត្រូវ​អនុញ្ញាត​ឱ្យ​ត្រឡប់​ទៅ​ធ្វើ​ការ​​ព្យាបាល​នៅផ្ទះ តាម​មធ្យោបាយ​សម​ស្រប​និង​មាន​សុវត្ថិភាព»៕