អនុវត្តទម្លាប់រស់នៅបែបនេះជា​ប្រចាំ ជួយ​សុខភាពបេះដូង!

សុខភាពបេះដូងគឺជារឿងសំខាន់ ដែលមនុស្សគ្រប់គ្នា មិនថាក្មេងឬ ចាស់នោះទេ មិនអាចមើលរំលងបាន។ ដូច្នេះ​ការជ្រើសរើស និងការផ្លាស់ប្ដូទម្លាប់នៃការញ៉ាំអាហារជារឿងចាំបាច់ ប្រសិនជាយើងចង់ឲ្យបេះ​ដូងមានសុខភាពល្អ។

ការ​ផ្លាស់ប្ដូរទម្លាប់មកញ៉ាំទឹកផ្លែឈើឲ្យបានយ៉ាងហោចពីរកែវដោយគ្មានបន្ថែមជាតិស្ករ ក្នុងមួយថ្ងៃ ជួយឲ្យ​ខ្លួនប្រាណរបស់យើងអាចអាច​ទទួលបានវីតាមីន រ៉ែ និងសារធាតុសរសៃ​ហ្វៃប៊ី ដែលជាសារធាតុសំខាន់ជួយបំពេញដល់សុខភាពរាងកាយ និង បេះដូង។ ក្រៅពីទឹកផ្លែឈើយើងក៏អាចសាកល្បងកែច្នៃទឹកបន្លែបៃតង​កិនចម្រុះ​យ៉ាង​ហោច​ឲ្យបានពីរកែវក្នុង​មួយ​ថ្ងៃ​ ក៏មានគុណប្រយោជន៍ដូចគ្នា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អាហារ​មួយ​ចំនួន​ដែល​មាន​ជាតិ​ខ្លាញ់​ខ្ពស់ និង​អាហារ​ដែលដាក់កម្រិតឈីស ប៊ឺ ការ៉េម សាច់កែច្នៃ និងខ្លាញ់ នំខេក និង​នំដូណាត់ ក៏​គួរ​កម្រិត​ការ​ញ៉ាំ​ដែរ ព្រោះ​អាហារ​ទាំងអស់នេះក៏ជាមូលហេតុបង្កបញ្ហាដល់សុខភាពបេះដូង។

គ្នា​យើង​ក៏​គួរ​ញ៉ាំពពួកអាហារសមុទ្រឲ្យបានច្រើន យ៉ា់ងហោចឲ្យពីរដងក្នុងមួយសប្ដាហ៍។ ការស្រាវជ្រាវថ្មីៗបង្ហាញថាការញ៉ាំត្រីដូចជាត្រីសាម៉ុន ត្រីធូណា អយស្ទ័រ ត្រីល្អិតដែលជាប្រភេទត្រីសម្បូរទៅដោយសារធាតុខ្លាញ់ អូមេហ្គា៣ គឺជំនួយដល់សុខភាពបេះដូង ដោយអាចជួយកាត់បន្ថយហានិភ័យជំងឺសរសៃឈាមបេះដូង។ ក្រៅពីនោះអាស៊ីដខ្លាញ់អូមេហ្គា ៣ ក៏​សម្បូរនៅ​ក្នុង​ស៊ុត និង​គ្រាប់ផ្លែ​ឈើផង​ដែរ។​

ដូច​គ្នាដែរ មុនពេលជ្រើសរើសមុខម្ហូបខ្ចប់​ស្រាប់ យើង​ត្រូវពិនិត្យឲ្យបានម៉ត់ចត់ លើផ្លាកសញ្ញា កំណត់សម្គាល់ និងព័ត៌មាន អំពីការប្រើប្រាស់ សារធាតុផ្សំ ព្រោះសារធាតុខ្លះអាចនឹងមិនល្អសម្រាប់អ្នកញ៉ាំ ដូចជាការប្រើប្រាស់សារធាតុស្ករខ្ពស់ ការប្រើ​ប្រាស់កម្រិតជាតិខ្លាញ់ មិនស្របទៅតាមកម្រិតស្ដង់ដាសុខភាព។ បន្ថែមពីនោះគួរតែកាត់បន្ថយការញ៉ាំភេស​ជ្ជៈ​កំប៉ុង ដែលមានកម្រិតជាតិស្ករខ្ពស់ និងគួរ​កាត់​បន្ថយ​ការ​ផឹក​គ្រឿងស្រវឹងផង​ដែរ​។

ជាមួយ​គ្នា​នេះ ការ​បង្កើតទម្លាប់ហាត់ប្រាណឲ្យបានយ៉ាងហោច ៣០នាទី ទៅ ១ម៉ោងជារៀងរាល់ថ្ងៃ នឹង​ជួយ​សម្រួលលំហូរឈាម​​មានដំណើរការល្អ ជួយ​ដល់ដំណើរការ​បេះដូង។ ការសិក្សាបានបង្ហាញថា ការហាត់ប្រាណ ឲ្យបានយ៉ាង​ហោច ៣០ ទៅ ៥០នាទី ប្រចាំថ្ងៃ មិនថាជាការហាត់ប្រាណបែប ជិះកង់ រត់ ដើរ រាំ គឺសុទ្ធតែអាចផ្ដល់អត្ថប្រយោជន៍ទៅដល់សុខភាព​រាងកាយ ជាពិសេសសុខភាពបេះដូង។

ជាក់ស្ដែងណាស់ថា ការជ្រើសរើសរបបអាហារបានត្រឹមត្រូវស្របតាមតម្រូវការសុខភាព និងផ្លាស់ប្ដូរទម្លាប់រស់នៅ​ធ្វើឲ្យមានសកម្មភាពជាប្រចាំ ពិតជាអាចជួយដល់សុខភាពបេះដូង និងអាចជួយឲ្យយើងកាន់តែមានអាយុវែង។

ក្នុងករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕ 

អត្ថបទផ្ដល់សិទ្ធិដោយ Hello Krupet