ស្ត្រីម៉ូដែល ជាប់កំណត់ត្រាពិភពលោក ដោយសារមានពុកចង្ការវែងស្អាត

អង់គ្លេស៖ ស្រ្តីម៉ូដែលដើមកំណើតឥណ្ឌាម្នាក់ មានពុកមាត់ប្រវែងជាង ១៥សង់ទីម៉ែត្រ បានក្លាយជាស្ត្រីវ័យក្មេងបំផុតនៅក្នុងពិភពលោក ដែលមានពុកចង្ការស្អាតគួរឲ្យស្រឡាញ់ នេះបើយោងតាមកំណត់ត្រាពិភពលោក Guinness។

នាង Harnaam Kaur អាយុ២៤ឆ្នាំ រស់នៅក្នុងទីក្រុង Slough រដ្ឋ Berkshire ចក្រភពអង់គ្លេស បានជាប់ឈ្មោះនៅក្នុងសៀវភៅកំណត់ត្រាពិភពលោក Guinness បន្ទាប់ពីនាងមានពុកចង្ការវែង និងគួរឲ្យស្រឡាញ់បំផុត។ នាងបានរៀបរាប់ថា ការទុកពុកមាត់ឲ្យបានវែង និងមានសោភ័ណ្ឌភាពគួរឲ្យទាក់ទាញ គឺជាផ្នែកមួយនៃភាពស្រស់ស្អាតលើរាងកាយនាង។

គួរបញ្ជាក់ថា នាង Harnaam Kaur មានអាការជំងឺ Polycystic Ovary ដែលអ័រម៉ូនរបស់នាងមិនមានតុល្យភាព និងអាចបង្កឲ្យរូបនាងមានដុះពុកចង្ការវែងបែបនេះ ហើយកាលពីខែមីនា ឆ្នាំ២០១៦កន្លងទៅនេះ នាង Harnaam Kaur ក៏បានក្លាយជានារីម៉ូដែលដំបូងបំផុត ដែលមានពុកចង្ការ ដែលបានដើរបង្ហាញម៉ូដប្រចាំសប្តាហ៍របស់ទីក្រុងឡុងដ៏។

ដោយឡែក ក្រៅពីកំណត់ត្រាដែលមានពុកមាត់វែងរបស់នាង ក៏នៅមានអ្នកចូលរួមក្នុងបញ្ជីផ្សេងទៀតផងដែរ ដូចជា ឆ្មាដែលមានខ្លួនវែងជាងបំផុតឈ្មោះ Ludo ដែលវាមានប្រវែង 1.183 ម៉ែត្រ ហើយម្ចាស់របស់វា នាង Kelsey Gill បានយកវាមកចិញ្ចឹមកាលពីឆ្នាំ២០១៤។ ខណៈកំណត់ត្រាចុងក្រោយគឺសត្វ llama អាយុ៩ឆ្នាំ ដែលលោតបានខ្ពស់បំផុត ដែលវាអាចលោតបានកម្ពស់ 1.13 ម៉ែត្រ។ សត្វមួយក្បាលនេះរស់នៅក្នុងកសិដ្ឋានមួយក្នុងក្រុង Porthmadog ភាគខាងជើងរដ្ឋ Wales ចក្រភពអង់គ្លេស៕

ប្រភព៖ បរទេស