ផលិតផលភេសជ្ជៈក្រុមហ៊ុនអង្គរដេលីហ៊្វូដ ទទួលបានការសរសើរពីដៃគូចែកចាយ ទាំងរសជាតិឆ្ងាញ់ជាប់ចិត្ត និងគុណភាពខ្ពស់ ក្រោយពេលសម្ពោធដាក់ឲ្យដំណើរការរោងចក្រជាផ្លូវការ

ភ្នំពេញ៖ ថ្ងៃទី២៨ ខែតុលា ឆ្នាំ២០១៧- ក្រោយពេលបើកសម្ពោធរោងចក្រផលិតទឹកផ្លែឈើ និងភេសជ្ជៈប៉ូវកម្លាំងដំណើរការជាផ្លែផ្លា ក្រុមហ៊ុនអង្គរដេលីហ៊្វូដ ខូអិលធីឌី (Angkor Daily Foods Co., Ltd) បានរៀបចំកម្មវិធីជប់លៀងដ៏អធិកអធម និងសែនសប្បាយរីករាយ នៅអគារកោះពេជ្រ J & K ពេញមួយល្ងាច ដើម្បីអបអរសាទរភាពជោគជ័យនៃការចាប់ផ្តើមដំណើរការរោងចក្ររបស់ខ្លួន រួមទាំងផ្សព្វផ្សាយផលិតផលដល់ដៃគូចែកចាយស្គាល់កាន់តែច្បាស់ និងទូលំទូលាយនៅក្នុងទីផ្សារទូទាំងប្រទេស។

ក្រោមការវិនិយោគទុនប្រមាណ 10លានដុល្លារអាមេរិករបស់ស្ថាបនិកជនជាតិខ្មែរ ឯកឧត្តម សាន លុន អគ្គនាយកក្រុមហ៊ុន អង្គរដេលីហ៊្វូដ ក្នុងការសាងសង់រោងចក្រ បំពាក់ឧបករណ៍បច្ចេកវិទ្យាទំនើបៗ បណ្តុះបណ្តាលបុគ្គលិកជំនាញធ្វើការដោយយកចិត្តទុកដាក់ និងទទួលខុសត្រូវខ្ពស់ និងជំរុញឲ្យដំណើរការបានជោគជ័យនៅក្នុងឆ្នាំ 2017 នេះ គឺដើម្បីបំពេញតម្រូវការអតិថិជនគ្រប់វ័យ ងាកមកគាំទ្រ និងទទួលទានភេសជ្ជៈផលិតក្នុងស្រុក ដែលមានរសជាតិឆ្ងាញ់ និងគុណភាពខ្ពស់ ។

នៅក្នុងបរិយាកាសជប់លៀងដ៏រីករាយ ជាមួយនឹងទស្សនីយភាពប្លែកអារម្មណ៍នៃការសម្ដែងក្បាច់រាំ ដើរបង្ហាញម៉ូតផលិតផលជាច្រើនមុខរបស់ផលិតផលភេសជ្ជៈអង្គរដេលីហ៊្វូដ ការប្រគំតន្ត្រីដ៏ពិរោះរណ្តំ រួមនិងការចាប់ឆ្នោតឈ្នះរង្វាន់ល្អៗជាច្រើន ធ្វើឲ្យអ្នកចូលរួម និងដៃគូចែកចាយបានរីករាយ និងស្គាល់ច្បាស់ពីផលិតផល ហើយកោតសរសើរនូវរសជាតិនៃផលិតផលពិតជាឆ្ងាញ់ជាប់ចិត្ត ដែលនេះសញ្ញាណវិជ្ជមានបង្ហាញថាផលិតផលក្នុងស្រុកមួយនេះ ពិតជាធ្វើឲ្យប្រជាជនខ្មែរមិនអាចខកខានក្នុងការសាកល្បងទទួលទាន និងជួយគាំទ្រផលិតផលខ្មែរនេះបានឡើយ។

លោកអគ្គនាយក បានបញ្ជាក់ទៀតថា រាល់សង្វាក់ផលិកម្មរបស់រោងចក្រយើង គឺដំណើរការឡើងដោយការធ្វើការយកចិត្តទុកដាក់ខ្ពស់ ក្រោមការពិនិត្យ និងទទួលខុសត្រូវខ្ពស់របស់អ្នកឯកទេសតាមផ្នែកនីមួយៗ ដែលយកគុណភាពជាចម្បង គោរពតាមស្តង់ដារអន្តរជាតិ ហើយយើងជឿងជាក់ថា ភេសជ្ជៈរបស់យើង នឹងអាចចូលរួមប្រកួតប្រជែងលើទីផ្សារទាំងក្នុង និងក្រៅស្រុកក្នុងពេលឆាប់ៗនេះ។

ក្រុមហ៊ុនអង្គរដេលីហ៊្វូដ ទទួលបាននូវវិញ្ញាបនបត្រពីស្ថាប័នលើការអនុវត្តផលិតកម្មល្អ GMP ,ប្រព័ន្ធសុវត្ថិភាពម្ហូបអាហារ HACCP ប្រព័ន្ធគ្រប់គ្រងគុណភាព ISO 9001: 2015 និងប្រព័ន្ធគ្រប់គ្រងសុវត្ថិភាពអាហារ ISO 22000:2005 ពីប្រទេស Australia ផងដែរ។

គួរបញ្ជាក់ថា ក្រុមហ៊ុនអង្គរដេលីហ៊្វូដ មានផលិតទឹកផ្លែឈើម៉ាក1-2 Drink មាន 6 រសជាតិ និងទឹកផ្លែឈើម៉ាក Selfy មាន 5រសជាតិ ក្នុងនោះមានរសជាតិ ដូចជា រសជាតិផ្លែក្រូច ចាហួយខ្មៅ ទឹកត្រឡាច ផ្លែឈើរី ស្ត្រូបប៊ឺរី, ប៊្លូប៊ឺរី ប្រទាលកន្ទុយក្រពើ ទៀបបារាំង និងផ្លែគូលែន រួមនិងភេសជ្ជៈប៉ូវកម្លាំងម៉ាក Champion និង Red Ant។

បច្ចុប្បន្នក្រុមហ៊ុន មានលទ្ធភាពផលិតភេសជ្ជៈកំប៉ុងដោយម៉ាស៊ីនស្វ័យប្រវត្តិ ដែលផលិតបាន 15,000 កំប៉ុងក្នុងមួយម៉ោង៕