ជំនួយដល់ការគេង រួមជាមួយនឹងការស្រកទម្ងន់ដោយប្រើភេសជ្ជៈទឹកត្រសក់ស្រូវមួយមុខនេះ!

ផ្លែត្រសក់ស្រូវមានទំហំ មានពូជ និងពណ៌២ប្រភេទខុសៗគ្នា គឺត្រសក់ស្រូវសម្បកបៃតង និងត្រសក់ស្រូវសម្បកលឿង។ បើទោះបីជាវាមានរូបរាង ពណ៌សម្បុរខុសគ្នាយ៉ាងណាក៏ដោយ ប៉ុន្តែគេនៅតែដឹងថា វាជាផ្លែឈើដែលសម្បូរទៅដោយជាតិទឹកប្រមាណជា ៩០ភាគរយ និងមានជាតិវីតាមីនជាច្រើនដែលអាចជំនួយសុខភាព បន្សុទ្ធជាតិពុល បង្កើនកម្រិតទឹកនោម ជួយសម្រកទម្ងន់ គ្មានជាតិខ្លាញ់ដែលធ្វើឱ្យធាត់ និងអត្ថប្រយោជន៍ច្រើនមុខទៀតសម្រាប់សុខភាពរាងកាយផងដែរ។

ដើម្បីឱ្យកាន់តែជ្រាបច្បាស់ មកតាមដានគុណប្រយោជន៍លម្អិតរបស់ផ្លែត្រសក់ស្រូវទាំងអស់គ្នា រួមជាមួយនឹងរូបមន្តធ្វើភេសជ្ជៈទឹកត្រសក់ស្រូវផងដែរ ដូចខាងក្រោម៖

# គុណប្រយោជន៍ផ្លែត្រសក់ស្រូវ

- បើទោះជាត្រសក់ស្រូវគ្មានជាតិកាឡូរី និងសារធាតុធ្វើឱ្យធាត់យ៉ាងណាក៏ដោយ តែវាជាប្រភពដែលសម្បូរទៅដោយវីតាមីន និងអាហាររូបត្ថម្ភសំខាន់ៗជាច្រើនដែលមានប្រយោជន៍ចំពោះសុខភាព

- ផ្លែត្រសក់ស្រូវសម្បូរទៅដោយ វីតាមីន A និងសារធាតុប្រឆាំងអុកស៊ីតកម្មដែលអាចជួយការពាររាងកាយ និងភ្នាសកោសិកា ពីការកើតជំងឺផ្សេងៗដូចជា ជំងឺផ្តាសាយ និងហៀរសម្បោរជាដើម

- សារធាតុ Flavonoids ដែលមាននៅក្នុងផ្លៃត្រសក់ស្រូវដើរតួនាទីជាសារធាតុប្រឆាំងអុកស៊ីតកម្មនិងរ៉ាឌីកាល់សេរីដែលមានលទ្ធភាពរារាំងទប់ស្កត់ពីជំងឺមហារីកកាចសាហាវដូចជា៖ ជំងឺមហារីកពោះវៀនធំ ជំងឺមហារីកសុដន់ និងមហារីកលំពែង។

- ត្រសក់ស្រូវ មានសារធាតុសំខាន់ដែលជួយអាចដល់ចក្ខុ ពីការប៉ះពាល់ និងការកើតជំងឺទាក់ទងនឹងប្រស្រីភ្នែកផ្សេងៗដូចជា៖ អាការអន់ភ្នែក មើលមិនសូវច្បាស់ និងជំងឺភ្នែកដែលកើតឡើងចំពោះមនុស្សដែលស្ថិតនៅក្នុងវ័យចំណាស់

- ជាតិប៉ូតាស្យូម នៅក្នុងផ្លែត្រសក់ស្រូវ ក៏អាចមានលទ្ធភាពការពាររាងកាយអ្នកពីជំងឺទាក់ទងនឹងបេះដូង ថែមទាំងជួយធ្វើឱ្យសម្ពាធឈាម និងចង្វាក់បេះដូងមានសុខភាពល្អប្រក្រតីផងដែរ

- ជាតិវីតាមីន C ក៏មាននៅក្នុងផ្លែត្រសក់ស្រូវផងដែរ ដែលអាចជួយការពាររាងកាយពីមេរោគ បាក់តេរីផ្សេងៗយ៉ាងល្អប្រសើរ

- ផ្លែត្រសក់ស្រូវក៏អាចជួយបញ្ចេញសារធាតុពុលផ្សេងៗចេញពីរាងកាយតាមរយៈទឹកនោមផងដែរ ជាពិសេសគឺជំនួយដល់ប្រព័ន្ធរំលាយអាហារឱ្យដំណើរការល្អ បំបាត់ចំណង់នៃការទទួលទានអាហារ ជំនួយដល់ការសម្រកទម្ងន់ទៀតផង ដោយគ្រាន់តែអ្នកទទួលទានផ្លែត្រសក់ស្រូវមួយផ្លែ ជារៀងរាល់ថ្ងៃ ៥ថ្ងៃជាប់គ្នា និងជាពិសេសត្រូវតមអាហារដែលមានជាតិខ្លាញ់ជាតិស្ករបន្ថែមនោះ អ្នកនឹងឃើញពីភាពប្រែប្រួលដ៏អស្ចារ្យជាមិនខាន។

ក្រៅពីការយកមកទទួលទានស្រស់ៗ អ្នកក៏អាចបង្កើនសមត្ថភាពគុណសម្បត្តិរបស់ផ្លែត្រសក់ស្រូវដោយគ្រាន់តែយកផ្លែត្រសក់ស្រូវមកធ្វើជាភេសជ្ជៈងាយៗ ដែលមិនត្រឹមតែជួយដល់ការសម្រកទម្ងន់ទេ ថែមទាំងជួយធ្វើឱ្យអ្នកគេងលក់ស្រួល និងស្កប់ស្កល់រាល់យប់ផងដែរ។ 

# រូបមន្តភេសជ្ជៈត្រសក់ស្រូវជំនួយដល់ការគេង និងសម្រកទម្ងន់

គ្រឿងផ្សំ

- ផ្លែត្រសក់ស្រូវទុំ ២ពែង

(យកត្រសក់ស្រូវទុំចិតសម្បក កាត់ជាដុំៗទំហំល្មម)

- ទឹកក្រូចឆ្មារសម្បកលឿង ១ស្លាបព្រា (ក្រូចឆ្មារធម្មតាក៏បាន)

- ទឹកឃ្មុំបន្តិច

ការអនុវត្ត៖ ដោយគ្រាន់តែអ្នកយកផ្លែត្រសក់ស្រូវទៅកិន ឬក្រឡុកឱ្យហ្មត់ជាមួយនឹងទឹកក្រូចឆ្មារ រួចបន្ថែមទឹកឃ្មុំបន្តិចដើម្បីបង្កើនរសជាតិឱ្យផ្អែមឆ្ងាញ់ ហើយអាចបន្ថែមទឹកកកក៏បាន ជាការស្រេច។ បន្ទាប់មក អ្នកអាចយកភេសជ្ជៈនេះមកទទួលទានដើម្បីសុខភាព និងសម្រស់របស់អ្នកបានហើយ។

ការប្រើប្រាស់៖

- ប្រសិនជាអ្នកគេងមិនសូវលក់ ឬមានបញ្ហាការគេងដោយការគេងមិនបានស្កប់ស្កល់ល្អ និងចេះតែភ្ញាក់ៗកណ្តាលយប់នោះ អ្នកអាចទទួលទានភេសជ្ជៈមួយនេះ មួយកែវរាល់ពេលយប់មុនពេលចូលគេង។

- សម្រាប់ការសម្រកទម្ងន់អ្នកអាចទទួលទាននៅពេលណាក៏បាន ជាពិសេសពេលដែលអ្នកឃ្លានចំណីតែម្តង។ 

ចំណាំ៖ ត្រូវចាំថាត្រូវតែប្រើប្រាស់តែផ្លែត្រសក់ស្រូវធម្មជាតិ គ្មានជាតិគីមីប៉ុណ្ណោះសម្រាប់ការទទួលទាន និងធ្វើជាភេសជ្ជៈ ជាពិសេសត្រូវតែជាផ្លែត្រសក់ស្រូវទុំ ព្រោះការទទួលទានផ្លែត្រសក់ស្រូវខ្ចីៗអាចធ្វើឱ្យប៉ះពាល់ដល់ក្រពះរបស់អ្នកបាន៕