ហុងដា

នាយហុងដា មានឈ្មោះដើមថា អឿន សុខា អាយុ៤៥ឆ្នាំ។ តារាកំប្លែងរូបនេះមានអតីតជាអ្នកលេងល្ខោនបាសាក់តវង្សត្រកូលពីដូនតា តាំងពីឆ្នាំ១៩៧៩ ដោយលេងក្នុងក្រុមសិល្បៈល្ខោនបាសាក់វង្ស «ស្រេងព្រួញមាស»។ ហើយក្រោយមកនៅឆ្នាំ២០០០ នាយហុងដា ក៏បានចូលប្រឡូកនៅក្នុងវិស័យសិល្បៈសម្រៀងសម័យ និងសម្តែង។ បន្ទាប់មកក៏បានរៀបការជាមួយនាង វ៉ែន សុធារី ហៅឃ្មឹប ដែលជាកូនលោក ជីវ៉ាន់ ស៊ុយ ហើយមានកូនប្រុស២នាក់ ក្រោយរួមរស់ជាមួយគ្នាអស់រយៈពេល១២ឆ្នាំ។ បន្តមកនៅក្នុងកំឡុងឆ្នាំ២០០៧-២០០៨ ក៏បានចូលសម្តែងក្នុងក្រុមនាយកុយ ដោយទទួលបានការគាំទ្រយ៉ាងខ្លាំង។ រហូតដល់ឆ្នាំ២០១០ លោក ហុងដា ក៏បានលែងលះគ្នាជាមួយអ្នកនាងឃ្មឹប ដោយសារមានបញ្ហាចម្រូងចម្រាស់ជាច្រើន។ ចំពោះកូនប្រុសទាំងពីរ ខាងលោកហុងដាបានយកកូនប្រុសច្បងមកចិញ្ចឹម ដោយបច្ចុប្បន្នមានអាយុ១៦ឆ្នាំ។ ចំណែកកូនប្អូនមានអាយុ៩ឆ្នាំត្រូវបានទៅរស់នៅជាមួយនាងឃ្មឹបជាម្តាយបង្កើត។ ក្រោយពេលលែងលះគ្នាជាមួយភរិយាដើម នាយហុងដាក៏បានរៀបអាពាហ៍ពិពាហ៍ជាថ្មីជាមួយនាង ស៊ឹម ចន្ធី អាយុ១៩ឆ្នាំ និងមានកូនស្រីម្នាក់។ក្រៅពីអាជីពជាអ្នកកំប្លែងនាយហុងដាក៏មានអាជីពជាអ្នកកាត់សក់តាមរោងការផ្សេង ហើយក៏ជាតារាសម្តែងក្នុងខ្សែភាពយន្តខ្នាតខ្លី និងថតចម្រៀងកាយវិការ ក៏ដូចជាស្ពតពាណិជ្ជកម្មផងដែរ។