ភ្នំពេញ៖ នាពេលបច្ចុប្បន្ន គេឃើញថាមាន តំបន់ទេសចរណ៍ជាច្រើនកន្លែង នៅក្នុងស្រុក ដែលកំពុងទាក់ទាញភ្ញៀវទេសចរជាតិ ជាហូរហែឲ្យទៅសម្រាក លំហែកម្សាន្តអារម្មណ៍ ជាមួយក្រុមគ្រួសារ មិត្តភក្តិ និងមនុស្សជាទីស្រលាញ់ នៅក្នុងថ្ងៃឈប់សម្រាក បន្ទាប់ពីការងារ រកស៊ី និងការសិក្សាម្តងៗ។
ជាក់ស្តែង កន្លែងទេសចរណ៍ក្នុងស្រុកយើង ភាគច្រើនក៏មានទេសភាព មិនចាញ់ប្រទេសគេប៉ុន្មានទេ។ មានទាំង តំបន់ទេសចរណ៍តាម បែបធម្មជាតិ និងតំបន់ទេសចរណ៍ បែបកែច្នៃ។ ជាមួយបរិយាកាសធម្មជាតិ យ៉ាងស្រស់បំព្រង រួមនិងខ្យល់អាកាសបរិសុទ្ធ ព័ទ្ធជុំវិញទៅដោយ ធម្មជាតិបែបខៀវស្រងាត់ ពិតជាអាចធ្វើឲ្យ ទុក្ខកខ្វល់ទាំងឡាយ រសាត់បាត់ទៅអស់ផងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយ៉ាងណាមិញ នៅក្នុងខណៈពេលដែល ប្រទេសកំពុងស្ថិតក្នុង វិបត្តិនៃការរីករាលដាលឆ្លង នៃមេរោគCOVID-19 នេះ មានប្រជាពលរដ្ឋជាច្រើន គឺពិតជាមិនអាចចេញទៅខាងក្រៅ ដើរកម្សាន្តដូចកាលពីលើកមុនៗ បាននោះឡើយ។ អ្នកទាំងអស់គ្នាប្រាកដជាកំពុងតែ រកមើលនៅតំបន់ទេសចរណ៍ដែលស្រស់ស្អាត ទុកសម្រាប់ដើរកម្សាន្តបន្ទាប់ពីCOVID-19 ស្ងប់ស្ងាត់ទៅវិញហើយមែនទេ? ដូច្នេះនៅថ្ងៃនេះ ខ្មែរឡូត បាននាំអារម្មណ៍ ទស្សនិកជនទាំងអស់គ្នា ទៅស្គាល់ តំបន់ទេសចរណ៍ មួយចំនួននៅក្នុងស្រុក ដែលកំពុងតែពេញនិយមខ្លាំង ហើយអាចកត់សម្គាល់ទុក សម្រាប់ ដើរកម្សាន្តបាន នៅថ្ងៃឈប់សម្រាក នាពេលខាងមុខនេះ៕
តោះចង់ដឹងថា មានរមណីយដ្ឋានណាខ្លះនោះ សូមទៅតាមដានទាំងអស់គ្នា៖
១. តំបន់ទេសចរណ៍ឧទ្យានជាតិគិរីរម្យ
ឧទ្យានជាតិគិរីរម្យ ស្ថិតនៅចម្ងាយ ប្រមាណ១១២គីឡូម៉ែត្រ ពីរាជធានីភ្នំពេញ។ ដើម្បីអាចទៅដល់ ឧទ្យានជាតិមួយនេះបាន លោកអ្នកត្រូវធ្វើដំណើរ ដោយឆ្លងកាត់តាមផ្លូវជាតិលេខ៤ តាមផ្លូវទៅកាន់ ក្រុងព្រះសីហនុ។ ឧទ្យានជាតិគិរីរម្យ មានទីតាំងស្ថិតនៅក្នុង ភូមិដំរីផុស ឃុំគិរីរម្យ ស្រុកភ្នំស្រួច ខេត្តកំពង់ស្ពឺ ដែលបានលាតសន្ធឹង លើផ្ទៃដីដែលមានព្រៃឈើ ប្រមាណ៨ម៉ឺនហិចតា។ (រូបភាព៖ OneStep Adventure/មួយជំហាន)
២. ថ្មលយ នៅគិរីរម្យ
ភ្ញៀវទេសចរ ដែលទៅលេងគិរីរម្យ ភាគច្រើនគឺតែងតែ តម្រង់ទៅកាន់តំបន់ទឹកធ្លាក់ ឬ ទៅតំបន់កែច្នៃ ដូចជាសួនសិប្បនិម្មិត ដើម្បីថតរូប។ ប៉ុន្តែមិនសូវមាន អ្នកទៅដល់នឹងបានស្គាល់ នៅតំបន់ថ្មលយ នេះប៉ុន្មាននោះទេ។ ប្រសិនបើ លោកអ្នកទៅដល់ហើយទៅឈរនៅ កន្លែងថ្មលយនោះ អ្នកនឹងបានគយគន់ នៅទេសភាពព្រៃឈើខៀវស្រងាត់ ជាមួយនឹងជួរភ្នំក្រវាញ ដែលលាតសន្ធឹង នៅភាគនិរតីនៃ ប្រទសកម្ពុជាយើងផងដែរ។ (រូបភាព៖ Chou Seom )
៣. ជ្រោះផ្តាច់ព្រលឹង សសរស្តុក គិរីរម្យ
គឺជាកន្លែងធម្មជាតិមួយ ដែលសាកសមបំផុតសម្រាប់អ្នក ដែលចូលចិត្តដំណើរកម្សាន្តបែបផ្សងព្រេង ទៅជាមួយមិត្តភក្តិ៣ ទៅ៤ នាក់ បោះតង់ស្តាប់សម្លេងសត្វយំ និងសម្រាក ជាមួយបរិយាកាសព្រៃភ្នំ នៅជុំវិញខ្លួន។ (រូបភាព៖ OneStep Adventure/មួយជំហាន )
៤. ឧទ្យានដងព្រែក នៅខេត្តកំពត
ឧទ្យានដងព្រែក មានទីតាំងស្ថិតនៅ ភូមិបត់ក្បាលដំរី ឃុំមាក់ប្រាង ស្រុកទឹកឈូ ខេត្តកំពត់។ មានចម្ងាយប្រហែលជា ៧ គីឡូម៉ែត្រ ពីរង្វង់មូលធូរេ៉ន។ ឧទ្យានដងព្រែក គឺជារមណីយដ្ឋាន កែច្នៃដែលមានកញ្ចុះៗ សម្រាប់ភ្ញៀវទេសចរ សម្រាកនិងទទួលទានអាហារបាន។ លើសពីនេះ នៅតំបន់ទេសចរណ៍ បែបកែច្នៃមួយនេះ ក៏អាចឲ្យភ្ញៀវទេសចរជាតិ និងអន្តរជាតិទាំងឡាយ ចុះលេងទឹក, ជិះទូកកាយ៉ាក, ជិះខ្សែរ៉ក, ជិះកង់លើទឹក, បោះតង់, និងលោតខ្សែពួរ ជាដើម។(រូបភាព៖ OneStep Adventure/មួយជំហាន)
៥. សហគមន៍ត្រពាំងសង្កែ នៅខេត្តកំពត
សហគមន៍ត្រពាំងសង្កែ គឺជាកន្លែងកម្សាន្ត មួយកន្លែងដែលអភិរក្ស ហ៊ុមព័ទ្ធដោយព្រៃកោងកាង ចម្ងាយប្រមាណ១២ គីឡូម៉ែត្រពីខេត្តកំពត។ ដោយនៅក្នុងរមណីយដ្ឋាននេះ ភ្ញៀវទេសចរអាចដាំកូនកោងកាង ទុកជាអនុស្សាវរីយ៍ នៅក្នុងសហគមន៍, អានសៀវភៅ នៅក្នុងបណ្ណាល័យ, ជិះទូកមើលព្រៃកោងកាង នៅជាប់មាត់សមុទ្រ, ទទួលទានអាហារ នៅកញ្ចុះមាត់សមុទ្រ និងអាចស្នាក់នៅ ក្នុងសហគមន៍ផងដែរ។ (រូបភាព៖ OneStep Adventure/មួយជំហាន)
៦. កាហ្វេលើភ្នំ នៅខេត្តកំពត
ជាកន្លែងដែលភ្ញៀវទេសចរជាតិ និងអន្តរជាតិ អាចសម្រាកញុំាកាហ្វេ គយគន់មើលទេសភាពពីលើភ្នំ និងថែមទាំងអាចបានឃើញទេសភាព ដ៏ស្រស់ស្អាតនៅពេលព្រះអាទិត្យ រៀបលិចបានផងដែរ។(រូបភាព៖ PN Travel and Tours)
៧. រមណីយដ្ឋាន ឆ្នេរខ្សាច់សតាបារាំង
មានខ្សាច់សក្បោស ទឹករាក់ៗស្រួលលេង ទឹកសមុទ្រដូចគ្រីស្តាល់ មិនចាញ់ស្រុកគេឡើយ។ រមណីយដ្ឋាន ឆ្នេរខ្សាច់សតាបារាំង មានចម្ងាយប្រមាណ១៩០ គីឡូម៉ែត្រ ពីរាជធានីភ្នំពេញ។ លោកអ្នកត្រូវធ្វើដំណើរ តាមបង្គោលគីឡូម៉ែត្រលេខ១៦៣ ហួសបន្តិច ប្រហែល៥០០ម៉ែត្រ នឹងដល់តានៃ។ ពីតានៃ រហូតដល់ផ្លូវបត់ឆ្វេង ដែលមានស្លាកសញ្ញា«ក្រសួងអភិវឌ្ឍន៍ជនបទ» ធ្វើដំណើរ មានចំងាយ ១០គីឡូម៉ែត្រ រហូតដល់ស្លាកសញ្ញា «រមណីយដ្ឋានពយយាយម៉ៅ» ចំងាយ ៩.៥ គីឡូម៉ែត្រ ទៅរមណីយដ្ឋាន ឆ្នេរខ្សាច់ស តាបារាំង មានចំងាយ ៧.៥ គីឡូម៉ែត្រ។
៨. សហគមន៍អេកូទេសចរណ៍ ជីផាត នៅក្នុងខេត្តកោះកុង
សហគមន៍អេកូទេសចរណ៍ ជីផាត ស្ថិតក្នុងភូមិជីផាត ឃុំជីផាត ស្រុកថ្មបាំង នៃខេត្តកោះកុង។ ជីផាត មានចម្ងាយ១៥០គីឡូម៉ែត្រ ពីទីក្រុងភ្នំពេញ។ ដើម្បីទៅដល់សហគមន៍ អេកូទេសចរណ៍ជីផាត ភ្ញៀវទេសចរទាំងអស់ ត្រូវធ្វើដំណើរឆ្លងកាត់ផ្លូវជាតិលេខ៤៨ ត្រង់ចំណុចផ្លូវបំបែក ហួសស្ពានអណ្តូងទឹកប្រហែល៥ គីឡូម៉ែត្រ រួចបន្តដំណើរ តាមផ្លូវគ្រួសក្រហម រហូតដល់ភូមិជីផាតផងដែរ។
៩. កោះស្តេច នៅក្នុងខេត្តកោះកុង
កោះស្តេច លោកអ្នកអាចធ្វើដំណើរ តាមផ្លូវជាតិលេខ៤៨ ពីទីក្រុងភ្នំពេញ មកទីរួមខេត្តកោះកុង ហើយធ្វើដំណើរបន្ត៨១ គីឡូម៉ែត្រទៀត ទើបដល់កោះស្តេច។ នៅតាមបណ្តោយផ្លូវគឺ ពោរពេញទៅដោយរុក្ខជាតិ ពណ៌បៃតងគួរឲ្យចង់គយគន់ជាច្រើន ហើយក្នុងពេលខ្លះ ភ្ញៀវទេសចរមួយចំនួន ក៏បានប្រទះឃើញ នៅសត្វព្រៃដើរឆ្លងកាត់ផងដែរ។ បើអ្នកធ្វើដំណើរចាប់ពីខែមិថុនា រហូតដល់ខែធ្នូនោះ អ្នកនឹងឃើញតំបន់ព្រៃឈើ បៃតងដ៏ខៀវស្រងាត់។ (រូបភាព៖ ជ្រួលជ្រើម-Jruol Jrerm)
១០. តំបន់ទេសចរណ៍កោះកុងក្រៅ
ឆ្នេរកោះកុងក្រៅស្ថិត នៅក្នុងភូមិកោះកាពិ ឃុំកោះកាពិ ស្រុកកោះកុង ខេត្តកោះកុង។ កោះកុងក្រៅនេះ មានចម្ងាយប្រមាណ៣០ គីឡូម៉ែត្រពីក្រុងខេមរភមិន្ទ ដែលភ្ញៀវទេសចរជាតិ និងអន្តរជាតិអាចធ្វើដំណើរទៅកាន់ តំបន់នេះបានតាមរយៈផ្លូវទឹក ដោយចំណាយពេល ប្រមាណ៤០នាទី ទើបទៅដល់កោះ មួយនេះផងដែរ។
១១. ភ្នំថ្មណាមលៀរ ខេត្តមណ្ឌលគិរី
ភ្នំណាមលៀរ ឬគេអាចហៅថាភ្នំថ្មយក្ស, ភ្នំលុប្រាណ, វាលថ្មរំអិល ជាដើម។ វាមានទីតាំងស្ថិតនៅភូមិទី១ ឃុំប៊ូស្រា ស្រុកពេជ្រាដា ខេត្តមណ្ឌលគិរី។ ភ្នំណាមលៀរ មានរយៈចម្ងាយប្រមាណ៤៧ គីឡូម៉ែត្រពីរង្វង់មូលគោព្រៃ។ តំបន់ទេសចរណ៍ ធម្មជាតិមួយនេះ សម្រាប់អ្នកដែលចូលចិត្ត ដំណើរកម្សាន្តបែបផ្សងព្រេង អាចសាកទៅកាន់តំបន់ ភ្នំមួយនេះបាន។ (រូបភាព៖ Sovanna Kem )
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
