ក្រុមហ៊ុន Apple ត្រូវពិន័យ១២លានដុល្លារនៅប្រទេសអ៊ីតាលី ករណីបោកប្រាស់លើភាពធន់នឹងទឹករបស់ iPhone

អ៊ីតាលី៖ ក្រុមហ៊ុន Apple ទើបតែត្រូវបានពិន័យជាប្រាក់ចំនួន ១០ លានអឺរ៉ូ (ប្រហែល ១២ លានដុល្លារ) នៅក្នុងប្រទេសអ៊ីតាលី ដោយសារតែការផ្សព្វផ្សាយភាពធន់នឹងទឹករបស់ឧបករណ៍របស់ខ្លួន មិនដូចនឹងការពិត។

អាជ្ញាធរនៅប្រទេសអ៊ីតាលីបង្ហាញថា ការផ្សព្វផ្សាយពាណិជ្ជកម្មរបស់ Apple គឺ «ជាការបោកបញ្ឆោតយ៉ាងធ្ងន់ធ្ងរ» ចំពោះភាពធន់នឹងទឹករបស់ iPhone។ និយតករបាននិយាយនៅក្នុងសេចក្តីថ្លែងការណ៍មួយថា ក្រុមហ៊ុន Apple ផ្សាយពាណិជ្ជកម្មទូរស័ព្ទ iPhone ថាមានភាពធន់នឹងទឹកដោយមិនបញ្ជាក់ថា ភាពធន់នឹងទឹកនោះគីសម្រាប់តែក្នុងស្ថានភាពជាក់លាក់ណាមួយតែប៉ុណ្ណោះ មិនមែនការពារបានរាល់ស្ថានភាពនោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្រុមហ៊ុនកំពុងបោកប្រាស់អតិថិជនរបស់ខ្លួន តាមរយៈការបដិសេធមិនទទួលខុសត្រូវ (disclaimers) របស់ខ្លួនដែលនិយាយថា ទូរស័ព្ទមិនត្រូវបានធានាទេក្នុងករណីខូចខាតដោយសារទឹក។ អតិថិជនក៏មិនត្រូវបានផ្តល់ការជួសជុលផងដែរ នៅពេលដែលទូរស័ព្ទរបស់ពួកគេខូចដោយសារទឹក និងវត្ថុរាវផ្សេងទៀត ដែលនេះគឺជាការបោកប្រាស់មួយ ពីព្រោះក្រុមហ៊ុននេះបានផ្សាយអំពីភាពធន់នឹងទឹករបស់ឧបករណ៍របស់ខ្លួន ។

ក្រុមហ៊ុន Apple បានបដិសេធមិនធ្វើអត្ថាធិប្បាយលើបញ្ហានេះទេ៕

• ជំនួញ
• ទូរសព្ទ