ថៃដាក់ពង្រាយយន្តហោះដ្រូន ក្រោយរកឃើញករណីអ្នកលួចឆ្លងដែន​ មានផ្ទុកជំងឺកូវីដ១៩

បាងកក៖ យន្តហោះ​ដ្រូនរបស់កងទ័ពអាកាសថៃ កំពុងត្រូវបាន​ដាក់ល្បាត​ពីលើអាកាស នៅតាមបណ្តោយព្រំដែនជាមួយប្រទេសមីយ៉ាន់ម៉ា ដើម្បី​ឃ្លាំមើលអ្នកឆ្លងកាត់ព្រំដែនខុសច្បាប់ ក៏ដូចជាការពារការ​ឆ្លងរាលដាលនៃជំងឺកាចសាហាវកូវីដ១៩។

មជ្ឈមណ្ឌលសន្តិសុខប្រតិបត្តិការបន្ទាន់នៃកងកម្លាំង​​យោធាថៃ បានចាប់ផ្តើមដាក់វិធានការរឹតបន្តឹងផ្សេងៗ រួមមាន ការប្រើប្រាស់យន្តហោះដ្រូន ការតំឡើងកាំមេរ៉ាឃ្លាំមើល ការដាក់រនាំង​បន្លាលួស​តាមតំបន់ចំណុចចេញចូល និងការបន្ថែមក្រុមប៉ូលិសយោធា​។ លើសពីនេះទៀត នៅខាងក្នុងប្រទេសថៃ ក្រុមប៉ូលិសកំពុងតែត្រូវបាន​ដាក់ពង្រាយ ដើម្បីត្រួតពិនិត្យទីតាំងអាជីវកម្មនិងរោងចក្រដែលជួលជនចំណាកស្រុក ​ក្នុងគោលបំណងស្វែងរកអ្នកដែលបានចូលក្នុងប្រទេសដោយខុសច្បាប់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបថា វិធានការ​រឹតបន្តឹងនៅចំណុច​តំបន់ព្រំដែននេះបានធ្វើឡើង បន្ទាប់ពីអាជ្ញាធរថៃបានរកឃើញ​មនុស្សចំនួន ៣នាក់ លួចឆ្លងដែនខុសច្បាប់​មកពីប្រទេសមីយ៉ាន់ម៉ា  ដោយមិនបានធ្វើចត្តាឡីស័ក ហើយមានផ្ទុកមេរោគកូវីដ១៩៕