បរាជ័យម្តងហើយ តែអ៊ីស្រាអែល​នឹង​ចាប់ផ្តើមបេសកកម្មជាថ្មី ក្នុងការបញ្ជូនយានទៅចុះចតនៅឋានព្រះច័ន្ទ​ ​

យេរូសាឡឹម៖ ប្រទេសអ៊ីស្រាអែល​នឹងចាប់ផ្តើមបេសកកម្ម បញ្ជូនយាន​គ្មានមនុស្សទៅកាន់ឋានព្រះច័ន្ទជាថ្មីនៅដើមឆ្នាំ២០២៤ បន្ទាប់ពី​បេសកកម្មលើកដំបូងរបស់ខ្លួនកាលពីឆ្នាំមុនឈ្មោះថា Beresheet 1 ត្រូវ​ទទួលបរាជ័យ ដោយយាន​បានធ្លាក់​ពេលព្យាយាមចុះចត។

យោងតាម​សេចក្តីថ្លែងការណ៍របស់​ក្រសួងវិទ្យាសាស្ត្រ និងបច្ចេកវិទ្យាអ៊ីស្រាអែលបានឱ្យដឹងថា បេសកកម្មឡើងទៅឋានព្រះច័ន្ទជាថ្មី ដែលមានឈ្មោះថា Beresheet 2 នឹងប្រើប្រាស់យានចំនួន២ ដោយយានមួយសម្រាប់ហោះអង្កេតជុំវិញព្រះច័ន្ទ ចំណែកយានមួយ​ទៀត សម្រាប់ចុះចតផ្ទាល់នៅលើផ្ទៃព្រះច័ន្ទ ដើម្បីធ្វើការ​វិភាគនិងប្រមូលទិន្នន័យ​ផ្សេងៗ។ 

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបថា បេសកកម្ម Beresheet 2 ដែលនឹងធ្វើឡើងនៅឆ្នាំ២០២៤ ខាងមុខនេះ គ្រោងនឹងចំណាយថវិកាប្រមាណ ១០០លានដុល្លារ ដែល​ជាថវិកាទទួលបាន​ពីដៃគូអន្តរជាតិ ​និងម្ចាស់ជំនួយផ្សេងទៀត។ ហើយក្នុងនោះ ក្រុមហ៊ុនបច្ចេកវិទ្យាអ៊ីស្រាអែល​ គឺ​ Israel Aerospace Industries (IAI) ​រួមទាំង​អង្គការអវកាសមិនរកប្រាក់ចំណេញ SpaceIL ក៏នឹងចូលរួមក្នុងបេសកកម្មនេះផងដែរ៕