រកឃើញផូស៊ីលនាគសមុទ្របុរាណដ៏កម្របំផុត មានសភាពនៅល្អ

អង់គ្លេស៖ អ្នកប្រមាញ់ផូស៊ីលជនជាតិអង់គ្លេសបានរកឃើញ «ត្រីនាគសមុទ្រ» ដែលកាលពីមុនគេមិនទាន់អាចកំណត់អត្តសញ្ញាណ នៅលើឆ្នេរសមុទ្រអង់គ្លេសភាគខាងត្បូង។ លោក Steve Etches បានជីករកឃើញផូស៊ីលពូជសត្វ ichthyosaur ដែលរក្សាទុកយ៉ាងល្អ នៅក្នុងថ្មកំបោរនៅលើឆ្នេរ Jurassic ក្នុងតំបន់ Dorset។ គាត់គិតថា ផូស៊ីលនេះមិនធម្មតាទេ ដែលរូបលោកបានយកវាទៅឲ្យអ្នកជំនាញនៅសាកលវិទ្យាល័យ Portsmouth ភាគខាងត្បូងប្រទេសអង់គ្លេស ដើម្បីសិក្សា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ពូជសត្វ ichthyosaurus ដែលមានប្រវែង២ម៉ែត្រនិងធ្លាប់រស់កាលពី១៥០លានឆ្នាំមុន ត្រូវបានគេដាក់ឈ្មោះថា «នាគសមុទ្រ Etches» (Thalassodraco etches)។ ឥឡូនេះ អ្នកវិទ្យាសាស្ត្របានកំណត់អត្តសញ្ញាណពូជសត្វ ichthyosaur ចំនួន៥ប្រភេទ នៅចុងសម័យ Jurassic នៅចក្រភពអង់គ្លេស។ ពួកវាត្រូវបានគេស្គាល់ថា ជានាគសមុទ្រដោយសារតែធ្មេញនិងភ្នែកធំជាងធម្មតារបស់សវា។

ផូស៊ីលនៃពូជសត្វ ichthyosaurs មកពីក្នុងសម័យនេះគឺកម្របំផុត ប៉ុន្តែផូស៊ីលមួយនេះវិញត្រូវបានរក្សាទុកយ៉ាងល្អ ក៏ព្រោះតែវាធ្លាប់រស់នៅបាតសមុទ្រ នៅពេលបាត់បង់ជីវិត។ នេះមានន័យថា ផ្នែកខាងមុខនៃរាងកាយរបស់វាត្រូវបានកប់ចូលក្នុងភក់ ដែលជួយការពារវាពីការស៊ីរាងកាយទាំងមូលរបស់វា ពីសំណាក់សត្វដទៃ។

សត្វ Thalassodraco etchesi នេះទំនងជាសំកាំងខ្លួននៅក្នុងទឹកដោយប្រើកន្ទុយរបស់វា សម្រាប់ធ្វើដំណើរទៅមុខ ជាជាងប្រើព្រុយ ហើយឆ្អឹងជំនីរជ្រៅជាប់ទាក់ទងជាមួយនឹងសួតដ៏ធំរបស់វា អាចជួយឲ្យសត្វនេះមុជចូលទឹកយ៉ាងជ្រៅផងដែរ៕

• វិទ្យាសាស្រ្ត