សង្គម៖ អាជីវករភាគច្រើន បង្ហាញការត្អូញត្អែរ ចំពោះតម្លៃម្ទេស លើទីផ្សារក្នុងស្រុក ព្រោះតែមានការឡើងថ្លៃខ្លាំង គួរឲ្យកត់សម្គាល់ ដែលជាហេតុធ្វើឲ្យ អ្នកទិញភាគច្រើន បញ្ចេញការមិនពេញចិត្ត លើបណ្តាញសង្គម នឹងទាមទារចង់ដឹងពី មូលហេតុដែលបណ្តាលឲ្យ មានបញ្ហានៃ ការឡើងថ្លៃម្ទេសនេះឡើង។
អាជីវករជាច្រើន នៅផ្សារបឹងកេងកង បានបញ្ជាក់ឲ្យដឹងថា រឿងតម្លៃម្ទេសឡើងថ្លៃនេះ គឺជាការពិតមែន ហើយមិនមែនមកពី ពួកគាត់ចង់លក់ ក្នុងតម្លៃថ្លៃបែបនេះទេ តែព្រោះតែពួកគាត់យកត មកពីឈ្មួញកណ្តាល ក្នុងតម្លៃថ្លៃបែបនេះ ទៅហើយ។ សម្រាប់គាត់ ដែលជាអ្នកលក់ផ្ទាល់ ក៏ពិបាកក្នុងការលក់ចេញ ទៅឲ្យអ្នកទិញដូចគ្នាដែរ។
អាជីវករម្នាក់ ដែលលក់បន្លែ ក្នុងផ្សារបឹងកេងកង បានប្រាប់មកកាន់ខ្មែរឡូត ឲ្យដឹងថា ភាគច្រើនក្នុងអំឡុងខែនេះ ម្ទេសតែងតែមាន ការឡើងថ្លៃបែបនេះ។ ពោលគឺ ក្នុងពេលធម្មតា ម្ទេសនាំចូលមក ១គីឡូតម្លៃត្រឹមតែ១ម៉ឺន ទៅ ១ម៉ឺន៥ ពាន់រៀល តែប៉ុណ្ណោះ។ តែក្នុងពេលថ្មីៗនេះ តម្លៃម្ទេសហាក់មានការឡើងថ្លៃខ្លាំង រហូតដល់ទៅ២ម៉ឺន៥ពាន់ ដល់ទៅ៣ម៉ឺនរៀល ឯណ្ណោះ។ ហើយនេះក៏ជាបញ្ហាដែល អ្នកស្រីមិនហ៊ានយកមកលក់ ដូចពេលរាល់ដងដែរ ដោយសារតម្លៃថ្លៃ ពិបាកលក់ព្រោះក្នុង ១ខាំត្រូវលក់ចេញ ៣០០០រៀលទៅហើយ។
រីឯអាជីវករ ម្នាក់ទៀតនេះ ក៏បានលើកឡើង មិនខុសគ្នាប៉ុន្មានដែរថា ម្ទេសដែលយកមកលក់លើទីផ្សារ ក្នុងស្រុកយើងនេះគឺ មានការនាំចូលមកពី ៣ប្រភពផ្សេងៗគ្នា ក្នុងនោះមានដូចជាមកពី ប្រទេសវៀតណាម ថៃ និងរបស់ខ្មែរយើងផ្ទាល់។ ក៏ប៉ុន្តែ សម្រាប់ម្ទេសខ្មែរ ជាធម្មតាមានតម្លៃថ្លៃ ជាងម្ទេសនាំចូល ដោយសារតែវា មានគុណភាពល្អជាង។ ហើយចំពោះ មូលហេតុពិតប្រាកដ នៃការឡើងថ្លៃនេះ គាត់ក៏មិនសូវជា ដឹងច្បាស់ដែរ តែអាចបណ្តាលមកពី តម្លៃម្ទេសដែល នាំចូលពីខាងក្រៅ មកមានការឡើងថ្លៃស្រាប់ និងដោយសារតែកង្វះ នៃការផ្គត់ផ្គង់ម្ទេស ក្នុងស្រុករបស់យើងផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
