អង្គការណាសាចង់បញ្ជូនសុនខយន្ត ​សម្រាប់បេសកកម្មរុករកនៅភពព្រះអង្គារ

បរទេស៖ អ្នកវិទ្យាសាស្ត្ររបស់អង្គការណាសា (NASA) បានបង្ហាញនូវគំនិតមិនធម្មតាមួយ ​តាមរយៈការប្រើប្រាស់សុនខយន្ត ជំនួសឱ្យយានរុករកផ្សេងទៀត ដើម្បីទៅបំពេញបេសកកម្មនៅភពព្រះអង្គារ (ភពក្រហម)។

យោងតាមរបាយការណ៍របស់គេហទំព័រ Live Science បានឱ្យដឹងថា អ្នកវិទ្យាសាស្ត្រណាសាបានបង្ហាញជាគំនិត ថាសុនខយន្តទំនើបរបស់ក្រុមហ៊ុនបច្ចេកវិទ្យា Boston Dynamics អាចនឹងក្លាយជាជម្រើសល្អសម្រាប់​ប្រតិបត្តិការរុករកនៅភពព្រះអង្គារ​ ដោយសារតែវាអាចធ្វើដំណើរបាន​​លឿនទោះស្ថិតក្នុងរយៈចម្ងាយឆ្ងាយ និង​​ស័ក្តិសមគ្រប់លក្ខណៈភូមិសាស្ត្រ។ ហើយមិនតែប៉ុណ្ណោះ វាថែមទាំងអាចជួយបង្ហាញផែនទីសមរម្យ សម្រាប់​ធ្វើជាទីតាំងរបស់មនុស្ស ដែលអង្គការណាសា​គ្រោងនឹងបង្កើត នៅលើភពក្រហមនេះនាពេលអនាគត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្រុមអ្នកវិទ្យាសាស្ត្រ បាននឹងកំពុងសាកល្បងនូវគំនិតថ្មី ដោយប្រើ​សុនខយន្តគំរូមានឈ្មោះថា Au-Spot ដែល​បំពាក់ជាមួយឧបករណ៍ថ្មីអាចជួយវាក្នុងការរុករក អាចកំណត់ទីតាំងនៅជុំវិញ អាចដើរជៀសឧបសគ្គនៅខាងមុខ ហើយ​ក៏អាចឱ្យវាក្រោកឈរវិញដែរ ប្រើសិនបើវាដើរជំពប់ដួល។

គួរជម្រាបថា​ បច្ចុប្បន្ន សុនខយន្តគំរូ Au-Spot គឺកំពុងត្រូវបានដាក់ឱ្យដំណើរការសាកល្បងនៅទីតាំងមួយក្នុងរដ្ឋកាលីហ្វ័រញ៉ា ដែល​ត្រូវបានគេរៀបចំដូចទៅនឹងស្ថានភាពភូមិសាស្ត្រ​នៅលើភពព្រះអង្គារដូច្នោះដែរ៕

• វិទ្យាសាស្រ្ត