មន្រ្តីអាជ្ញាធរជាតិអប្សរា អំពាវនាវឱ្យប្រជាពលរដ្ឋ កុំឲ្យធ្វើបាប និង កុំឱ្យចំណីទៅ សត្វភេរដែលរស់នៅក្នុងតំបន់អង្គរ

សៀមរាប៖ កាលពីពីរថ្ងៃមុននេះ មន្រ្តីអាជ្ញាធរជាតិអប្សរាថ្លែងការណ៍អំពាវនាវឱ្យប្រជាពលរដ្ឋរួមទាំងភ្ញៀវទេសចរណ៍ទាំងឡាយ ពេលឃើញសត្វភេរដែលរស់នៅក្នុងតំបន់អង្គរ សូមកុំធ្វើបាបវាឬ ក៏ឱ្យចំណីវាស៊ីឲ្យសោះ។

ដោយឡែក លោក ជូ រ៉ាឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និង បរិស្ថាននៃអាជ្ញាធរជាតិអប្សរា បានឱ្យដឹងថា សត្វភេរចំនួន៤ក្បាល ដែលអាជ្ញាធរជាតិអប្សរាបានយកប្រលែងឱ្យរស់បែបធម្មជាតិនៅតំបន់ខ្លោងទ្វាខ្មោចជិតប្រាសាទបាយ័ន ឥឡូវនេះវារស់នៅបានល្អ នៅក្នុងតំបន់នេះ និងបានចេញដើរឆ្ងាយៗជាងមុន ដែលពេលខ្លះដើររហូតទៅដល់បារាយណ៍ទឹកថ្លា ប៉ុន្តែពួកវាមិនដែលភ្លេចកន្លែងដែលវារស់នៅទេ គឺពួកវាតែងតែត្រឡប់មកវិញ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកបានបន្តថានៅពេលដែលសត្វភេរនេះចេញដើរឆ្ងាយៗដែលពេលខ្លះត្រូវឆ្លងកាត់ជិតផ្ទះអ្នកភូមិរស់នៅ ដូច្នេះនៅពេលបងប្អូនឃើញពួកវាកុំធ្វើបាបវា ហើយកុំឱ្យចំណីវាស៊ី។ដោយលោកបានពន្យល់ថា សត្វភេរនេះគឺអាជ្ញាធរអប្សរាឱ្យរស់នៅបែបធម្មជាតិរបស់វា ដោយឱ្យវាដើររកចំណីដោយខ្លួនឯង ព្រោះបើយើងឱ្យចំណីវាស៊ី វានិងធ្លាប់ ហើយវាក៏អាចបង្កគ្រោះថ្នាក់ដល់មនុស្សដែរ។ ដូចជាករណីសត្វស្វានៅក្នុងតំបន់អង្គរបច្ចុប្បន្ននេះចឹងដែរ ពេលភ្ញៀវទេសចរទៅលេងអង្គរតែងតែឱ្យចំណីវា ដូច្នេះពេលវាឃើញមនុស្សមកតែងតែរត់ ទៅរកមនុស្ស និងដណ្តើមរបស់នេះ របស់នោះពីមនុស្ស ដែលពេលខ្លះធ្វើឱ្យយើងបាត់ទ្រព្យសម្បត្តិនិងគ្រោះថ្នាក់ដោយសារវាផងដែរ។

ដូច្នេះហើយបានជាលោកសូមអំពាវនាវដល់ប្រជាពលរដ្ឋទាំងអស់ ដែលបានជួបនិងសត្វភេរដែលកំពុងរស់នៅក្នុងតំបន់អង្គរកុំទៅជិតវាកុំឱ្យចំណីវាស៊ីឱ្យសោះ ព្រោះថា បើយើងឱ្យវាស៊ីថ្ងៃក្រោយពេលវាឃើញមនុស្សវានិងរត់មករកមនុស្ស ហើយយើងគ្មានអ្វីឱ្យវាស៊ីទៀតវាអាចបង្កគ្រោះថ្នាក់ដល់យើងដូចជាតាមខាំដណ្តើមរបស់ដែលនៅជាប់ខ្លួនយើងដែលអាចធ្វើឱ្យយើងមានរបួសផងដែរ។ ប៉ុន្តែអ្វីដែលសំខាន់បើយើងស្រលាញ់វាមែនយើងត្រូវរួមគ្នាការពារកុំឱ្យមានអ្នកធ្វើបាបវាទៅបានហើយ៕

សូមទស្សនារូបភាពខាងក្រោម៖