ប្រទេសអូស្ត្រាលី រកឃើញវីរុសកូរ៉ូណាបំលែងពូជថ្មី ចេញពីចក្រភពអង់គ្លេស

បរទេស៖ ប្រទេសអូស្រ្តាលីបាន​ប្រកាសកាលពីថ្ងៃច័ន្ទថា ខ្លួនបានរកឃើញករណីឆ្លង​វីរុសកូរ៉ូណាបំលែងពូជថ្មី ដែលមានប្រភពចេញចក្រភពអង់គ្លេស ស្របពេលដែលហុងកុងនិងឥណ្ឌា ​សម្រេចផ្អាកជើងហោះហើរ​ចេញពីប្រទេសនៅទ្វីបអឺរ៉ុប (ចក្រភពអង់គ្លេស) មួយនេះ​ ដោយសារភ័យខ្លាចវីរុសប្រភេទថ្មី។

អាជ្ញាធរអូស្រ្តាលីបានគូសបញ្ជាក់ថា អ្នកដំណើរចំនួន ២នាក់  ដែលធ្វើដំណើរពីចក្រភពអង់គ្លេស ទៅកាន់រដ្ឋ​ New South Wales របស់ប្រទេសអូស្ត្រាលី ត្រូវបានគេរកឃើញថាមានផ្ទុក​វីរុសកូរ៉ូណាបំលែងពូជថ្មី ដែលចក្រភពអង់គ្លេសធ្លាប់អះអាងថា វាឆ្លងលឿនជាងវីរុសចាស់រហូតដល់ទៅ ៧០% ឯណោះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបថា ការផ្ទុះឡើងនៃករណីឆ្លង​វីរុសកូរ៉ូណាបំលែងពូជថ្មីនេះ បានធ្វើឱ្យប្រទេសជិតខាងរបស់ចក្រភពអង់គ្លេស និងប្រទេសជាច្រើនទៀតរួមទាំង កាណាដា និងអ៊ីរ៉ង់ ​ប្រកាសមិនឱ្យមានការធ្វើដំណើរទៅមកជាមួយប្រទេសនេះ។ ប៉ុន្តែបើទោះជាយ៉ាងណាក្តី ក្រុមអ្នកជំនាញបាននិយាយថា វ៉ាក់សាំង​ដែលត្រូវបានដាក់ឱ្យប្រើប្រាស់កាលពីពេលថ្មីៗនេះ គឺប្រហែលជាមានប្រសិទ្ធភាពប្រឆាំងនឹង​វីរុសប្រភេទថ្មីនេះ៕