អង្គការសុខភាពពិភពលោក គ្រោងអនុម័តឱ្យប្រើវ៉ាក់សាំងកូវីដ១៩របស់ក្រុមហ៊ុន Pfizer ក្នុងករណីបន្ទាន់

បរទេស៖ អង្គការសុខភាពពិភពលោក ហៅកាត់ (WHO) ​បានប្រកាសថា ខ្លួននឹងផ្តល់ការអនុញ្ញាតឱ្យប្រើប្រាស់​ក្នុងករណីបន្ទាន់ នូវវ៉ាក់សាំងកូវីដ១៩ ដែលផលិតឡើងដោយក្រុមហ៊ុន Pfizer ជាសហការជាមួយ​ BioNTech នៅពេលឆាប់ខាងមុខនេះ។

ជំនួយការអគ្គនាយករងអង្គការសុខភាពពិភពលោក លោកស្រី ម៉ារីយ៉ានហ្គេឡា ស៊ីមៅ (Mariangela Simao) បានប្រាប់ក្រុមអ្នកយកព័ត៌មាននៅទីក្រុងហ្សឺណែវប្រទេសស្វីសកាលពីថ្ងៃច័ន្ទថា ការប្រកាសអនុម័តគឺអាចនឹងធ្វើឡើងនៅដំណាច់ឆ្នាំនេះ។ ចំណែកលោកស្រី សោមយ៉ា ស្វាមីណាថាន់ (Soumya Swaminathan) ប្រធាន​ក្រុម​អ្នកវិទ្យាសាស្ត្រ WHO ក៏បានលើកឡើងដែរថា ដំណើរការចែកចាយវ៉ាក់សាំងកូវីដ១៩ នឹងប្រពឹត្តទៅក្រោមកម្មវិធី COVAX របស់ការអង្គការ​ WHO ដែលគ្រោងធ្វើឡើងយ៉ាងឆាប់បំផុត គឺនៅដើមខែក្រោយ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបថា បច្ចុប្បន្នជំងឺកូវីដ១៩ បានឆ្លងរាលដាលដល់មនុស្សជាង ៧៧.៧លាននាក់ ដោយក្នុងនោះមានអ្នកស្លាប់ជាង ១.៧១លាននាក់ និងអ្នកជាសះស្បើយជាង ៥៤.៦៤លាននាក់៕