កូរ៉េខាងត្បូងបញ្ជូនយន្តហោះចម្បាំង ទៅស្ទាក់យន្តហោះចិននិងរុស្ស៊ី ១៩គ្រឿង ដែល​រំលោភចូលដែនអាកាសរបស់ខ្លួន

សេអ៊ូល៖​ ​អគ្គសេនាធិការចម្រុះកូរ៉េខាងត្បូង (JCS) បានឱ្យដឹង​កាលពីថ្ងៃអង្គារម្សិលមិញនេះថា យន្តហោះចម្បាំង​កូរ៉េខាងត្បូងជាច្រើនគ្រឿង បានចេញប្រតិបត្តិការហោះ​​បណ្តេញយន្តហោះយោធារុស្ស៊ី ១៥គ្រឿង និងចិនចំនួន ៤គ្រឿង ដែលបើករំលោភចូល​តំបន់កំណត់អត្តសញ្ញាណការពារដែនអាកាសរបស់ខ្លួនដោយខុសច្បាប់។

សេចក្តីថ្លែងការណ៍របស់ JCS បាន​គូសបញ្ជាក់ថា "​ហេតុការណ៍នេះ គឺទំនងជាការធ្វើ​សមយុទ្ធយោធារួមគ្នារវាងចិននិងរុស្ស៊ី ប៉ុន្តែវាទាមទារឱ្យមានការវិភាគបន្ថែមទៀត"។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោធាកូរ៉េខាងត្បូងនិយាយថា ខាងយោធាចិនបានជូនដំណឹងដល់កូរ៉េខាងត្បូង ថាយន្តហោះរបស់ខ្លួនកំពុងធ្វើការហ្វឹកហាត់ជាប្រចាំ មុនពេល​បើកចូល​ដល់តំបន់ហាមឃាត់របស់កូរ៉េខាងត្បូង។ ទន្ទឹមនឹងនេះ ក្រសួងការបរទេសកូរ៉េខាងត្បូង បានទាក់ទង​ទៅភាគីចិននិងរុស្ស៊ី ហើយ​ថែមទាំងព្រមានថា មិនគួរឱ្យ​រឿងនេះកើតឡើងម្តងទៀតនោះទេ។

គួរជម្រាបថា កាលពីខែកក្កដា ឆ្នាំមុន យន្តហោះចម្បាំង​កូរ៉េខាងត្បូង បានធ្វើការបាញ់ព្រមានយន្តហោះយោធារុស្ស៊ីនិងចិនរាប់រយគ្រាប់ ​នៅពេលពួកគេបើកចូលតំបន់ដែនអាកាស​ហាមឃាត់របស់ខ្លួន។ កូរ៉េខាងត្បូងក៏ដូចជាជប៉ុន ​ធ្លាប់​បានចោទប្រកាន់ប្រទេស​រុស្ស៊ីនិងចិន ពីបទរំលោភចូលដែនអាកាសរបស់ពួកគេ ប៉ុន្តែបើទោះបីជាយ៉ាងណាក្តី រុស្ស៊ីនិងចិនបានចេញមុខបដិសេធ៕