ការសិក្សាថ្មីបានបង្ហាញថា រណ្ដៅនៅលើឋានព្រះចន្ទមានចំនួនច្រើន ជាងការគិតពីមុនៗ

បរទេស៖ រណ្ដៅព្រះចន្ទបានបង្កើតឡើងនៅពេលដែលអាចម៍ផ្កាយបានហោះទៅបុកផ្ទៃរបស់ព្រះចន្ទ។ ដូចគ្នានឹងផូស៊ីលនៅលើផែនដី ពួកវាបានបង្ហាញប្រាប់អ្វីមួយអំពីប្រវត្តិនៃប្រព័ន្ធព្រះអាទិត្យ និងពីរបៀបដែលភពត្រូវបានបង្កើតឡើង។ ដោយប្រើប្រាស់បញ្ញាសិប្បនិម្មិត AI អ្នកវិទ្យាសាស្ត្រចិនបានប៉ាន់ស្មានថា មានរណ្ដៅជាង១០ម៉ឺននៅលើឋានព្រះចន្ទ នេះបើយោងតាមការសិក្សាដែលចេញផ្សាយកាលពីថ្ងៃអង្គារ នៅក្នុងទិនានុប្បវត្តិ Nature Communications។

ការសិក្សានេះបាននិយាយថា វាច្រើនជាងចំនួន៩,១៣៧ដែលត្រូវបានទទួលស្គាល់ដោយ សហភាពតារាសាស្ត្រអន្តរជាតិ ហើយភាគច្រើនរកឃើញតាមរយៈព័ត៌មាននិងការប្រើប្រាស់រូបភាព។ ដោយប្រើទិន្នន័យលើរណ្ដៅដែលកំណត់បានកាលពីមុនចំនួន៧,៨៩៥និងរណ្ដៅដែលមានកំណត់អាយុកាលចំនួន១,៤១១ ក្រុមអ្នកវិទ្យាសាស្ត្រអាចប្រើប្រាស់ការរៀនសូត្ររបស់ម៉ាស៊ីន ដើម្បីបង្វឹកប្រព័ន្ធបណ្ដាញ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ដោយមានព័ត៌មានពីយានទី១និងទី២របស់ចិន គឺឆាងអឺទី១និងទី២ បណ្ដាញបានរកឃើញរណ្ដៅថ្មីចំនួន១០៩,៩៥៦។ រណ្ដៅកើតពីការបុកទង្គិចគឺជាផ្នែកមួយសំខាន់លើផ្ទៃឋានព្រះចន្ទ។ វាខុសគ្នាពីផ្ទៃនៅលើផែនដីរបស់់យើង។ វាមានការលំបាកក្នុងការតាមដានប្រវត្តិរបស់ផែនដី ដោយមានការបុកទង្គិចពីអាចម៍ផ្កាយនិងផ្កាយដុះកន្ទុយ ជាង៤ប៊ីលានឆ្នាំកន្លងទៅនេះ។

ផែនដីនិងព្រះចន្ទត្រូវបានវាយប្រហារដោយអង្គពីអវកាសយ៉ាងច្រើននិងជាច្រើនលើក ប៉ុន្តែរណ្ដៅដ៏ធំលើព្រះចន្ទបានឆ្លងកាត់ចំនួនកំណត់នៃការរិចរិល អស់រយៈពេលរាប់ពាន់លានឆ្នាំមកហើយ។ ដូច្នេះ រណ្ដៅនៅឋានព្រះចន្ទអាចឲ្យគេតាមដានពីការវិវត្តរបស់ផែនដីផងដែរ។ រណ្ដៅនៅលើឋានព្រះចន្ទទាំងឡាយមិនមានទឹក បរិយាកាស និងសកម្មភាពផ្លាកតិចតូនិច ដែលកត្តាទាំងបីនេះបានលុបបំបាត់ស្នាមរណ្ដៅនៅលើផែនដី មិនឲ្យមើលឃើញ៕

• វិទ្យាសាស្រ្ត