ក្រុមហ៊ុន សាមសុង បា្ររព្ធពិធីបិទវគ្គបណ្តុះបណ្តាល Samsung Tech Institute សម្រាប់ឆ្នាំ ២០២០ នៅវិទ្យាស្ថានជាតិបណ្តុះបណ្តាលបច្ចេកទេស!

ភ្នំពេញ៖ វគ្គបណ្តុះបណ្តាល Samsung Tech Institute ជំនាន់ទី២ ដែលបង្កើតឡើងដោយក្រុមហ៊ុន សាមសុង និង វិទ្យាស្ថានជាតិបណ្តុះបណ្តាលបច្ចេកទេស (NTTI) ដែលបានចាប់ផ្តើមកាលពីថ្ងៃទី០៥ ខែកញ្ញា ឆ្នាំ២០២០ និងមានរយៈពេល ៩ សប្តាហ៍ លើមុខជំនាញ ជួសជុលបរិក្ខារអេឡិចត្រូនិច (CE) និង ស្មាតហ្វូន (IM) នៅពេលនេះបានចប់សព្វគ្រប់ដោយជោគជ័យជាស្ថាពរហើយ។

សូមបញ្ជាក់ថា កម្មវិធីបណ្តុះបណ្តាល Samsung Tech Institute ដែលបានបង្កើតឡើងមកនេះ គឺមានសិក្ខាកាមចូលរួមចំនួន ៥០ រូប ហើយវគ្គបណ្តុះបណ្តាលនេះគឺពិតជាមានសារៈសំខាន់ខ្លាំងណាស់ ក្នុងការអភិវឌ្ឍន៍សមត្ថភាព ចំណេះជំនាញ និងទេព្យកោសល្យ ដល់សិក្ខាកាមជំនាន់ក្រោយ ជាពិសេសផ្តល់ឱកាសការងារឱ្យមានភាពកាន់តែទូលំទូលាយ ដល់សិស្សនិស្សិតកម្ពុជាទាំងមូលផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ពិធីបិទវគ្គបណ្តុះបណ្តាល Samsung Tech Institute

លោក សឹងហូរ ឆយ (Mr. Seungho Choi) អគ្គនាយកសាខា ក្រុមហ៊ុនថៃ សាមសុង អេឡិចត្រូនិច ប្រចាំប្រទេសកម្ពុជា បានមានប្រសាសន៍ថា៖

« វគ្គបណ្តុះបណ្តាល Samsung Tech Institute គឺពិតជាដើរតួយ៉ាងសំខាន់បំផុតក្នុងការបង្កើតធនធានមនុស្សផ្នែកអេឡិចត្រូនិចនៅក្នុងប្រទេសកម្ពុជា ដោយផ្តល់នូវចំណេះដឹងច្បាស់លាស់ អមជាមួយទ្រឹស្តី និងការអនុវត្តផ្ទាល់ជាមួយនឹងផលិតផលអេឡិចត្រូនិចទំនើបៗ ថ្មីៗ របស់ក្រុមហ៊ុន សាមសុង ដែលកំពុងត្រូវបានប្រើប្រាស់ និងគាំទ្រជុំវិញពិភពលោក» ។

ប្រសាសន៍លោក សឹងហូរ ឆយ

លោកបានបន្ថែមទៀតថា៖

« សាមសុង តែងតែផ្តល់តម្លៃខ្ពស់បំផុត ក្នុងការចូលរួមចំណែកអភិវឌ្ឍសង្គម សហគមន៍ និងពិភពលោកទាំងមូលឱ្យមានភាពកាន់តែងាយស្រួល និងប្រសើរឡើង។ អ្វីដែលយើងចង់បានបំផុតនោះ គឺសូមឱ្យសិក្ខាកាមដែលបានបញ្ចប់ការសិក្សាពីវគ្គបណ្តុះបណ្តាលនេះទាំងអស់ នឹងអាចប្រើប្រាស់ជំនាញ ចំណេះដឹងរបស់ខ្លួនដើម្បីស្វែងរកការងារល្អ ជាមួយប្រាក់ខែខ្ពស់ ដើម្បីផ្គត់ផ្គង់ក្រុមគ្រួសារ និងចូលរួមក្នុងការអភិវឌ្ឍន៍សង្គមជាតិទាំងមូលផងដែរ» ។

ប្រសាសន៍លោក សឹងហូរ ឆយ

ឆ្លៀតក្នុងឱកាសបិទវគ្គបណ្តុះបណ្តាលនោះ លោកឯកឧត្តមបណ្ឌិត យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស ក៏បានធ្វើការកោតសរសើរ និងរីករាយក្រៃលែង ចំពោះការយកចិត្តទុកដាក់ និងការលះបង់ដែលមានតម្លៃមិនអាចកាត់ថ្លៃបានរបស់ក្រុមហ៊ុន សាមសុង ក្នុងការចូលរួមលើកកម្ពស់វិស័យបច្ចេកវិទ្យា ក៏ដូចជាវិស័យធនធានមនុស្សនៅក្នុងប្រទេសកម្ពុជា។

ប្អូនប្រុស ដួង ពៅរ៉ាដា ជាសិស្សម្នាក់ក្នុងចំណោមសិស្សទាំងអស់ ដែលបានបញ្ចប់វគ្គបណ្តុះបណ្តាល Samsung Tech Institute នេះបានឱ្យដឹងថា៖

« វគ្គសិក្សាផ្នែកបច្ចេកវិទ្យា និងអេឡិចត្រូនិចជាមួយនឹងបរិក្ខារទំនើបៗផ្ទាល់ ដែលក្រុមហ៊ុន សាមសុង ផ្តល់ជូនបែបនេះ គឺពិតជាមានតម្លៃណាស់ ដូច្នេះខ្ញុំត្រូវតែចាប់យកឱកាសនេះឱ្យជាប់ ដើម្បីឈោងចាប់យកការងារដែលពាក់ព័ន្ធទៅនឹងផ្នែកបច្ចេកវិទ្យា និងគ្រឿងបរិក្ខារអេឡិចត្រូនិចសម្រាប់ថ្ងៃអនាគតឱ្យបាន» ។

ការលើកឡើងរបស់ ដួង ពៅរ៉ាដា

សូមបញ្ជាក់ថា ក្រុមហ៊ុន សាមសុង ក៏បានផ្តល់ឱកាសការងារដល់សិក្ខាកាមឆ្នើម និងមានពិន្ទុខ្ពស់ជាងគេ ចំនួន ៤ រូប ផងដែរ ដើម្បីចុះហាត់ការដោយផ្ទាល់នៅក្រុមហ៊ុន សាមសុង ដោយទទួលបានអត្ថប្រយោជន៍ និងបា្រក់បៀរវត្សបន្ថែមផងដែរ។

លោក តេង សុភាព ដែលជាសាស្រ្តាចារ្យម្នាក់ ក្នុងចំណោមសាស្ត្រាចារ្យនៃវគ្គបណ្តុះបណ្តាល Samsung Tech Institute បានសម្តែងអារម្មណ៍ផ្ទាល់ខ្លួនថា៖

« ខ្ញុំសូមអរគុណ និងសរសើរដល់ការជួយឧបត្ថម្ភ និងការលះបង់ដោយឥតនឿយហត់របស់ក្រុមហ៊ុន សាមសុង។ ខ្លួនខ្ញុំផ្ទាល់ក៏ខិតខំប្រឹងប្រែងបង្ហាត់បង្ហាញ បង្រៀន និងណែនាំឱ្យអស់ពីសមត្ថភាពផងដែរ ដើម្បីធ្វើឱ្យសិក្ខាកាមទាំងអស់ទទួលបានចំណេះ ជំនាញ និងបទពិសោធន៍ច្បាស់លាស់ពោរពេញដោយទំនុកចិត្ត និងមានការងារធ្វើជាមួយនឹងប្រាក់ខែខ្ពស់» ។

ប្រសាសន៍លោក តេង សុភាព

ក្រុមហ៊ុន សាមសុង កម្ពុជា ក៏បានថ្លែងអំណរគុណផងដែរដល់ លោកគ្រូ អ្នកគ្រូ សាស្ត្រាចារ្យ និងគណៈគ្រប់គ្រងទាំងអស់ នៃវិទ្យាស្ថានជាតិបណ្តុះបណ្តាលបច្ចេកទេស (NTTI) ដែលបានធ្វើឱ្យវគ្គសិក្សានេះ ចេញជាផ្លែផ្កា និងបញ្ចប់ដោយជោគជ័យ។ ជាចុងក្រោយ ក្រុមហ៊ុន សាមសុង កម្ពុជា សូមឱ្យសិក្ខាកាមទាំងអស់យកចិត្តទុកដាក់ថែរក្សាសុខភាពឱ្យបានល្អដោយ លាងដៃញឹកញាប់ ពាក់ម៉ាស់ឱ្យបានត្រឹមត្រូវ និងអនុវត្តតាមគោលការណ៍សុវត្ថិភាពរបស់ក្រសួងសុខាភិបាលដើម្បីទប់ស្កាត់ប្រឆាំងនឹងការរីករាលដាលជំងី Covid-19 ទាំងអស់គ្នាផងដែរ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

In Case You Missed It