ស្តែងៗ! គ្រោះថ្នាក់រអិលបាក់​ដីនៅន័រវេស ​បណ្តាលឱ្យមនុស្ស ១១នាក់បាត់ខ្លួន ខណៈផ្ទះ​ជាច្រើនខ្នងត្រូវខូចខាតទាំងស្រុង (មានវីដេអូ)

អូស្លូ៖ យ៉ាងហោចណាស់​មានមនុស្ស ១១នាក់បានបាត់ខ្លួន និង ១០នាក់ផ្សេងទៀត ត្រូវរងរបួសធ្ងន់ស្រាល បន្ទាប់ពីគ្រោះថ្នាក់រអិលបាក់ស្រុតដីមួយ បានកើតឡើងនៅតំបន់ភាគខាងត្បូងប្រទេសន័រវេស កាលពីថ្ងៃពុធម្សិលមិញនេះ។

យោងតាមមន្ត្រីប៉ូលិសក្នុងតំបន់បានឱ្យដឹងថា ហេតុការណ៍គ្រោះថ្នាក់នេះ បានកើតឡើងនៅតំបន់លំនៅដ្ឋានមួយ​ក្នុងក្រុង Gjerdrum ដែលមានចម្ងាយប្រហែល ៣០គីឡូម៉ែត្រ ខាងជើង​រដ្ឋធានីអូស្លូ។ ក្នុងនោះដែរ ប៉ូលិសក៏បានជម្លៀសមនុស្សជាង ៩០០នាក់ ចេញពីតំបន់គ្រោះថ្នាក់ ខណៈក្រុមអ្នកជួយសង្គ្រោះកំពុងបន្តតាមប្រមាញ់រកអ្នកដែល​បាត់ខ្លួន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរ​ឱ្យដឹងដែរថា រូបភាពចេញពីទីកន្លែងកើតហេតុ បានបង្ហាញឱ្យឃើញនូវអគារផ្ទះសម្បែងជាច្រើនខ្នង ​បាក់ធ្លាក់ចូលទៅក្នុងរណ្តៅបាក់ស្រុតដី។ ហើយទន្ទឹមនឹងនេះ អាជ្ញាធរក៏បាន​ចេញសេចក្តីថា ប្រជាជនរហូតដល់ ១,៥០០នាក់ អាចនឹងត្រូវ​ចាកចេញពីតំបន់នេះ ដោយសារតែមានការព្រួយបារម្ភអំពីស្ថានភាពដី៕