យន្តហោះខ្នាតតូច ធ្លាក់ចំផ្ទះ​មួយខ្នងនៅ​រដ្ឋមីឈីហ្គែន បណ្តាលឱ្យមនុស្សបីនាក់ស្លាប់ (មានវីដេអូ)

មីឈីហ្គែន​៖ យោងតាមការិយាល័យប៉ូលិសប្រចាំតំបន់ Oakland បាន​ឱ្យដឹងថា មនុស្សចំនួន ៣នាក់ បានស្លាប់បាត់បង់ជីវិត បន្ទាប់ពីយន្ដហោះខ្នាតតូចមួយគ្រឿង ប្រភេទ Piper PA-24 បានធ្លាក់​​លើផ្ទះមួយខ្នងនៅក្រុង Lyon Township ​នៃរដ្ឋមីឈីហ្គែន។

ប្រភពដដែលបន្ថែមថា ​មនុស្សទាំង ៣នាក់ ដែលបានស្លាប់ត្រូវគេជឿជាក់ថា ​គឺមានម្នាក់ជាពីឡុត ​និង ២នាក់ ​ជាអ្នកដំណើរ។ ដោយឡែក ​គ្រួសាររស់នៅក្នុងផ្ទះកើតហេតុខាងលើ ដែលសមាជិក​សរុប​ ៥នាក់ បានរួចរស់ជីវិត ប៉ុន្តែផ្ទះរបស់ពួកគេត្រូវ​រងការខូចខាត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបដែរថា ហេតុការណ៍នេះបានកើតឡើង​កាលពីវេលាម៉ោង ៤រសៀល ថ្ងៃសៅរ៍កន្លងទៅនេះ។ ហើយទន្ទឹមនឹងនេះ ក្រុមមន្ត្រីជំនាញកំពុងបើកការស៊ើបអង្កេត ដើម្បីរកមូលហេតុដែលបង្កឱ្យមានគ្រោះថ្នាក់នេះឡើង៕