អង់គ្លេស​ប្រកាសបិទទ្វារប្រទេស​ ខណៈករណី​ឆ្លងវីរុសកូរ៉ូណាទម្រង់ថ្មី កំពុងកើនឡើងយ៉ាងខ្លាំង

អង់គ្លេស៖ នាយករដ្ឋមន្រ្តីអង់គ្លេស លោក បូរីស ចនសុន (Boris Johnson) បានប្រកាសដាក់ចេញនូវវិធានការបិទទ្វារថ្មីមួយ​ក្នុងប្រទេសអង់គ្លេស ដើម្បីប្រយុទ្ធប្រឆាំងនឹង​ករណីឆ្លងនៃវីរុសកូរ៉ូណាទម្រង់ថ្មី ដែល​កំពុងកើនឡើងយ៉ាងគំហុក។ លោក ចនសុន បានធ្វើការប្រកាសដាក់ចេញនូវវិធានការនេះតាមទូរទស្សន៍​កាលពីល្ងាចថ្ងៃច័ន្ទ​ ខណៈដែលអង់គ្លេសបានរាយការណ៍​ពីករណីឆ្លងកូវីដ១៩​ ចំនួន ៥៨,៧៨៤ករណីបន្ថែមទៀត​។

​ក្រោមវិធានការតឹងរ៉ឹងថ្មីនេះដែរ នាយករដ្ឋមន្រ្តីអង់គ្លេស​រូបនេះ ក៏បានជំរុញឱ្យពលរដ្ឋទាំងអស់ ត្រូវស្នាក់នៅក្នុងផ្ទះប្រសិនបើគ្មានការចាំបាច់កុំចេញទៅខាងក្រៅ ហើយចំពោះអ្នកដែលមិនគោរពតាមវិធានការនេះ គឺនឹងត្រូវពិន័យជាប្រាក់ ២០០ផោន ឬប្រមាណ ២៧០ដុល្លា។ បន្ថែមពីនេះ សាលាបឋមសិក្សា ​អនុវិទ្យាល័យ និងមហាវិទ្យាល័យទូទាំងប្រទេសអង់គ្លេស ត្រូវតែផ្លាស់ប្តូរទៅ​រៀនតាមប្រព័ន្ធអ៊ីនធឺណិតចាប់ពីថ្ងៃអង្គារនេះ រហូតដល់ពាក់កណ្តាលខែកុម្ភៈ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរជម្រាបដែរថា បច្ចុប្បន្នចក្រភពអង់គ្លេស មានករណីឆ្លងកូវីដ១៩ ចំនួន ២.៧លានករណី និងស្លាប់ ៧៥,៤៣១ករណី៕​