កុំឱ្យពិបាក! សាកលវិទ្យាល័យមួយនៅកាលីហ្វ័រញ៉ា ដាក់ម៉ាស៊ីនលក់ឧបករណ៍ធ្វើតេស្តរកកូវីដ ក្នុងសាលាតែម្តង

អាមេរិក៖ មានការខិតខំប្រឹងប្រែងជាច្រើនដើម្បីឱ្យមហាជនមានភាពងាយស្រួលក្នុងការស្វែងរកការធ្វើតេស្តរកមេរោគកូវីដ ក្នុងកំឡុងពេលមានជំងឺរាតត្បាតជាសកលនេះ។ សាកលវិទ្យាល័យកាលីហ្វ័រញ៉ានៅ San Diego បានរកឃើញដំណោះស្រាយដ៏ឆ្លាតវៃសម្រាប់និស្សិតនិងបុគ្គលិករបស់ខ្លួន នោះគឺដាក់ម៉ាស៊ីនលក់ប្រដាប់ធ្វើតេស្តរកកូវីដនៅជុំវិញបរិវេណសាលាតែម្តង។

នេះគឺជាផ្នែកមួយនៃ កម្មវិធីត្រឡប់ទៅរៀនវិញ របស់សាកលវិទ្យាល័យ។ ឧបករណ៍ធ្វើតេស្តរកកូវីដ-19 ដោយខ្លួនឯង អាចរកបានតាមរយៈម៉ាស៊ីនលក់ស្វ័យប្រវត្តិ (vending machine) ដែលមានដាក់នៅ11ទីតាំងឯណោះ។ ម៉ាស៊ីននេះមើលទៅដូចជាម៉ាស៊ីនលក់អាហារសម្រន់ធម្មតាអ៊ីចឹង ប៉ុន្តែវាមិនមានលក់នំដំឡូងបារាំងអ្វីទេ គឺវាមានតែឧបករណ៍ធ្វើតេស្តច្រមុះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នៅលើឧបករណ៍ធ្វើតេស្តមានលេខបារកូដដែលដំណើរការជាមួយកម្មវិធី app UC San Diego ដែលអាចឱ្យអ្នកប្រើប្រាស់ស្កេនចូលមើលលទ្ធផលតេស្តរបស់ពួកគេ។ ពេលធ្វើតេស្តហើយក្នុងរយៈពេល72ម៉ោង សាកលវិទ្យាល័យបានស្នើឱ្យនិស្សិត និងបុគ្គលិកយកវាមកទម្លាក់ក្នុងប្រអប់ដែលនៅជាប់នឹងម៉ាស៊ីន។

និស្សិតដែលស្នាក់នៅក្នុងសាលា ឬមកសាលា ត្រូវតម្រូវឱ្យធ្វើតេស្តជារៀងរាល់សប្តាហ៍។ ជាធម្មតាលទ្ធផលតេស្តនឹងអាចដឹងបានក្នុងរយៈពេលពីរថ្ងៃបន្ទាប់ពីធ្វើតេស្តហើយ។

ចាប់តាំងពីខែមីនាឆ្នាំមុនមក សាកលវិទ្យាល័យបានទទួលបានតេស្តរកកូវីដ-19របស់និស្សិតជាង 100,000តេស្ត និងតេស្តរបស់បុគ្គលិកជាង 28,000តេស្ត។ ភាគច្រើននៃថ្នាក់រៀនកំពុងធ្វើតាមអនឡាញ ទោះបីជាមានថ្នាក់មួយចំនួនត្រូវមករៀនផ្ទាល់ក៏ដោយ ដែលរួមបញ្ចូលទាំងថ្នាក់រៀនដែលត្រូវបានធ្វើឡើងនៅខាងក្រៅ (outdoor classrooms)។

សាលាមាននីតិវិធីសម្រាប់និស្សិតដែលមិនអនុវត្តតាមតេស្តដែលចាំបាច់ ដែលធ្វើឱ្យម៉ាស៊ីននេះកាន់តែមានសារៈសំខាន់។ ម៉ាស៊ីនទាំងនេះអាចជាការជំរុញទឹកចិត្តដល់សាលារៀន និងអង្គការដទៃទៀតដែលចង់ដាក់ការធ្វើតេស្តយ៉ាងម៉េចឱ្យល្អ ក្នុងកំឡុងពេលមានជំងឺរាតត្បាតដែលកំពុងបន្តផ្ទុះឡើង៕

• វិទ្យាសាស្រ្ត
• សាលា