ចិនបញ្ចេញវីដេអូ​ធ្វើសមយុទ្ធធំមួយ បន្ទាប់ពីលោក ស៊ី ជីនពីង បញ្ជាឱ្យទាហានទាំងអស់ ត្រៀមខ្លួនសំរាប់ការប្រយុទ្ធ

ប៉េកាំង! ទូរទស្សន៍រដ្ឋរបស់ប្រទេសចិន បានបញ្ចេញខ្សែវីដេអូបង្ហាញ​ពីសកម្មភាពកងទ័ពចិន ដែលចូលរួមក្នុងសមយុទ្ធយោធា​បាញ់គ្រាប់ពិត បន្ទាប់ពីលោកប្រធានាធិបតី ស៊ី ជីនពីង បានបញ្ជាឱ្យទាហាន​ប្រមាណ ២លាននាក់ ត្រូវត្រៀមខ្លួនសម្រាប់ការធ្វើសង្គ្រាមគ្រប់ពេល និងត្រូវមានភាពក្លាហានដោយមិនខ្លាចការស្លាប់នោះឡើយ។

ខ្សែ​វីដេអូដែល​ចុះផ្សាយដោយប៉ុស្តិ៍ទូរទស្សន៍ផ្លូវការរបស់ប្រទេសនេះ បានបង្ហាញពី​​​កងទ័ពជើងគោក ជើងអាកាស និង​ជើងទឹក ​​ឈរ​តម្រង់ជួរយ៉ាងមានសណ្តាប់ធ្នាប់ ​និងរង់ចាំត្រងត្រាប់ស្តាប់តាមមេបញ្ជការរបស់ពួកគេ។ បន្ថែមពីនេះ វាក៏បង្ហាញឱ្យឃើញពីទាហានប្រដាប់អាវុធកំពុងរត់ និងលោតចេញពីយន្តហោះយោធា​ ​សំដៅទៅរកសត្រូវនៅក្នុងសមរភូមិ​​ ស្របពេលដែល​កងរថក្រោះ កងឧទ្ធម្ភាគចក្រ នាវាចម្បាំង រួមទាំងនាវាមុជទឹកផងនោះ ចាប់ផ្តើមចេញប្រតិបត្តិការរបស់ខ្លួន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក ស៊ី ដែលជាប្រធានគណៈកម្មាធិយោធាមជ្ឈិមចិន (CMC) ​បាន​និយាយថា កងរំដោះប្រជាជនចិន ហៅកាត់ថា PLA ត្រូវតែត្រៀមខ្លួនជានិច្ច ដើម្បីធ្វើសកម្មភាពនៅរាល់វិនាទីណាមួយ។ ជាងនេះទៅទៀត លោកក៏បានទាមទារឱ្យកងទ័ពទាំងអស់ ត្រូវពង្រឹងស្មារតីប្រយុទ្ធ​ ក៏ដូចជាធ្វើឱ្យល្អឥតខ្ចោះនូវជំនាញប្រយុទ្ធរបស់ខ្លួន ដើម្បីស្វាគមន៍ខួប ១០០ ឆ្នាំនៃការបង្កើតបក្សកុម្មុយនិស្តចិននៅឆ្នាំនេះ។

គួរជម្រាបដែរ​ថា ​កាលពី​ពេលកន្លងមក​ លោកក៏ធ្លាប់បានអំពាវនាវឱ្យកងទ័ពរបស់លោក ​មិនត្រូវខ្លាចសេចក្តីស្លាប់ និងត្រូវរៀបចំខ្លួនដើម្បី​ធ្វើសង្គ្រាម​ ចំពេលមានភាពតានតឹងផ្នែកនយោបាយ រវាងប្រទេសចិននិងបណ្តាប្រទេសដទៃទៀត ជាពិសេសអាមេរិកនិងតៃវ៉ាន់ ​ដែលរាប់ចាប់ពីបញ្ហារោគ​ឆ្លងរាលដាលកូវីដ១៩ វិវាទទឹកដី និងបញ្ហាសិទ្ធិមនុស្សជាដើម៕