ឥណ្ឌូណេស៊ីជម្លៀស​ប្រជាជន ៥០០នាក់ ខណៈភ្នំភ្លើង Merapi បានផ្ទុះកក្រើក​ឡើង​

ចាកាតា៖ ភ្នំភ្លើងសកម្ម Merapi ក្នុងប្រទេសឥណ្ឌូណេស៊ីបាន​ផ្ទុះឡើង ដោយជះផេះនិង​ឧស្ម័នក្តៅឡើងទៅអាកាសយ៉ាងខ្លាំងកាលពីព្រឹកថ្ងៃព្រហស្បតិ៍នេះ ខណៈដែលប្រជាជនរាប់រយនាក់ ត្រូវបានជម្លៀសចេញ​រកទីកន្លែងមានសុវត្ថិភាព។

អាជ្ញាធរឥណ្ឌូណេស៊ីបានជម្លៀសប្រជាជនជាង ៥០០នាក់ ដែលរស់នៅ​តាមតំបន់ភ្នំក្នុងស្រុក Magelang ​នៃកោះជ្វា ស្របពេលដែលប្រជាជន​ផ្សេងទៀត បានចាកចេញពីផ្ទះសម្បែងនិងដីស្រែចំការរបស់ពួកគេ ដោយសារព្រួយបារម្ភពី​គ្រោះថ្នាក់នៃភ្នំភ្លើងសកម្មមួយនេះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ទីភ្នាក់ងារស្រាវជ្រាវនិងគ្រប់គ្រងគ្រោះមហន្តរាយឥណ្ឌូណេស៊ី បានធ្វើការប៉ាន់ស្មានថា ​ឧស្ម័នក្តៅដែលជះចេញពីរណ្ដៅភ្នំភ្លើង​ បានរាលដាលតិចជាង ១គីឡូម៉ែត្រ។ ហើយ​រហូតមកទល់ពេលនេះ គ្រោះថ្នាក់ដែល​អាចបង្កឡើងដោយសារភ្នំភ្លើង Merapi គឺមានមិនលើសពី ៥គីឡូម៉ែត្រនោះទេ។

Merapi ដែលជាភ្នំភ្លើងមានកម្ពស់ ២,៩៦៨ម៉ែត្រ គឺស្ថិតនៅចម្ងាយប្រហែល ៣០គីឡូម៉ែត្រ ពីចំណុចកណ្តាលទីក្រុង Yogyakarta ។ ​បើយោងតាមការបញ្ជាក់របស់អាជ្ញាធរនៅ​តំបន់ជុំវិញ​បានឱ្យដឹងថា ប្រជាជនប្រមាណមួយភាគបួនលាននាក់ រស់នៅក្នុងចម្ងាយប្រមាណ ១០គីឡូម៉ែត្រពីភ្នំភ្លើងនេះ។

គួរឱ្យដឹងដែរថា ​ឥណ្ឌូណេស៊ីគឺ​ជាប្រទេស​​ស្ថិតនៅ​តំបន់ខ្សែក្រវាត់ភ្លើងនៃមហាសមុទ្រប៉ាស៊ីហ្វិក​ (Pacific Ring of Fire) ដែលជាហេតុធ្វើឱ្យប្រទេសនេះតែងកើតមាននូវគ្រោះរញ្ជួយដី ​បន្ទុះភ្នំភ្លើង និងរលកយក្សស៊ូណាមិជាញឹកញាប់៕

• ធម្មជាតិ