យន្តហោះដឹកអ្នកដំណើរឥណ្ឌូណេស៊ី បាត់ដំណឹងសូន្យឈឹង ក្រោយហោះចេញពីរដ្ឋធានីចាកាតា

ចាកាតា៖ ប្រព័ន្ធផ្សព្វផ្សាយក្នុងស្រុកឥណ្ឌូណេស៊ីបានរាយការណ៍ថា យន្ដហោះក្រុមហ៊ុនអាកាសចរណ៍ Sriwijaya Air ដែលដឹកអ្នកដំណើរជាង ៦០នាក់​​ បានបាត់ការទាក់ទង បន្ទាប់ពី​ហោះចេញពីរដ្ឋធានី​ចាកាតា ក្នុងដំណើរឆ្ពោះទៅទីក្រុង Pontianak ក្នុងខេត្ត West Kalimantan កាលពីល្ងាចថ្ងៃសៅរ៍នេះ ។

ពាក់ព័ន្ធនឹងករណីនេះដែរ មន្ត្រីរដ្ឋាភិបាលក្នុងតំបន់ម្នាក់បានប្រាប់ទូរទស្សន៍ Kompas ថា ក្រុមអ្នកនេសាទ​បាន​ប្រទះឃើញនូវអ្វីដែលទំនងជាបំណែកនៃយន្ដហោះ ស្ថិតនៅដែនទឹកភាគខាងជើង​រដ្ឋធានីចាកាតា។​ ទន្ទឹមនឹងនេះ ក្រុមមន្ត្រីជំនាញកំពុង​ចុះត្រួតពិនិត្យ និងចេញប្រតិបត្តិការរុករក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្រុមអាជ្ញាធរបានគូសបញ្ជាក់ទៀតថា យន្តហោះខាងលើនេះជាប្រភេទ Boeing 737-500 ដែលប្រតិបត្តិការអស់ ២៦ឆ្នាំ ហើយវាបានបាត់ដំណឹងកាលពីវេលាម៉ោង ៣:៤០នាទី​។

គួររម្លឹកដែរថា​ កាលពីចុងឆ្នាំ ២០១៨ ធ្លាប់មានឧបទ្ទវហេតុធ្លាក់យន្តហោះប្រភេទ​ Boeing 737 MAX ប្រតិបត្តិការដោយក្រុមហ៊ុនអាកាសចរណ៍ឥណ្ឌូណេស៊ី Lion Air ដែលជាហេតុធ្វើឱ្យអ្នកដំណើរនិងបុគ្គលិកទាំងអស់សរុបចំនួន ១៨៩នាក់ បានស្លាប់បាត់បង់ជីវិត៕