អាមេរិកចោទប្រកាន់អ៊ីរ៉ង់ ថាបានផ្តល់ទីតាំងឱ្យក្រុម​ភេរវករ អាល់កៃដា

បរទេស៖ រដ្ឋមន្រ្តីក្រសួងការបរទេសសហរដ្ឋអាមេរិក លោក Mike Pompeo បាន​​ធ្វើការអះអាង​ក្នុងសុន្ទរកថាមួយនៅទីក្រុងវ៉ាស៊ីនតោនកាលពីថ្ងៃអង្គារថា ក្រុម​ភេរវករអាល់កៃដា បានបង្កើតមូលដ្ឋានថ្មីនៅក្នុងប្រទេសអ៊ីរ៉ង់ ហើយលោក​ព្រមទាំងបានជំរុញឱ្យអាមេរិកនិងប្រទេសសេរីទាំងអស់ ត្រូវ​បំផ្លាញទំនាក់ទំនងរវាង​អ៊ីរ៉ង់និងក្រុមអាល់កៃដា។

លោក Pompeo ក៏​បាន​បន្ថែមដែរថា បងធំទី២របស់ក្រុមអាល់កៃដា ត្រូវបានសម្លាប់នៅអ៊ីរ៉ង់កាលពីខែសីហា។ ហើយបុគ្គលនោះ គឺជាមេ​ខ្លោងម្នាក់ដែលនៅពីក្រោយការវាយប្រហារដោយគ្រាប់បែកលើស្ថានទូតអាមេរិក ​ក្នុងប្រទេសកេនយ៉ា និងតង់​សានីក្នុងឆ្នាំ ១៩៩៨។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឆ្លើយតបទៅនឹងបញ្ហានេះ ខាងភាគីអ៊ីរ៉ង់បានចេញមុខ​ច្រានចោលការ​ចោទប្រកាន់នេះ ដោយលើកឡើងថាវាជាការបំផ្លើស ហើយអាមេរិកក៏មិនមានភ័ស្តុតាងណាមួយ ដែលអាចបញ្ជាក់ឱ្យស្របតាមការអះអាងរបស់ខ្លួនបានដែរ។

គួរជម្រាបដែរថា ខណៈថ្ងៃផុតកំណត់នៃការកាន់តំណែងជាប្រធានាធិបតីរបស់លោក ដូណាល់ ត្រាំ កាន់តែខិតជិតមកដល់ សហរដ្ឋអាមេរិករិតតែបន្តដាក់សម្ពាធលើអ៊ីរ៉ង់។ ​ហើយកាលពីសប្តាហ៍មុន​ ប្រទេសមហាអំណាចមួយនេះ បានសម្រេចប្រកាសដាក់ទណ្ឌថ្មីៗដល់ប្រទេសអ៊ីរ៉ង់បន្ថែមទៀត ដោយយកលេសថា ជាការទប់ស្កាត់រដ្ឋាភិបាល​ទីក្រុងតេហេរ៉ង់ កុំឱ្យគាំទ្រដល់ក្រុមភេរវករបរទេស៕