មានរឿងមិនចេះចប់! ភ្នំភ្លើង Semeru នៅឥណ្ឌូនេស៊ីបានផ្ទុះឡើង ហុយផ្សែងផេះ 5kms ទៅលើមេឃ

ឥណ្ឌូនេស៊ី៖ ភ្នំភ្លើង Semeru ជាភ្នំភ្លើងដែលខ្ពស់បំផុតនៅលើកោះជ្វាដែលមានប្រជាជនច្រើនបំផុតនៅឥណ្ឌូនេស៊ី បានផ្ទុះឡើងដោយព្រូសផេះក្តៅគគុកប្រហែល4.5គីឡូម៉ែត្រឡើងពេញផ្ទៃមេឃ កាលពីថ្ងៃសៅរ៍។

មិនមានការជម្លៀសចេញភ្លាមៗនោះទេ ប៉ុន្តែទីភ្នាក់ងារកាត់បន្ថយគ្រោះមហន្តរាយជាតិបានព្រមានដល់ប្រជាជនដែលរស់នៅក្នុងភូមិតាមជើងភ្នំដែលមានកម្ពស់3,676ម៉ែត្រនេះ ឱ្យប្រុងប្រយ័ត្ននឹងគ្រោះថ្នាក់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកនាំពាក្យទីភ្នាក់ងារលោក Raditya Jati បាននិយាយថា ប្រជាជនដែលនៅជុំវិញអាងទន្លេនៅជើងភ្នំគួរប្រយ័ត្ននឹងកម្រិតទឹកភ្លៀងខ្ពស់ដែលអាចបង្កឱ្យកម្អែលភ្នំភ្លើងហូរមក។

មជ្ឈមណ្ឌលដោះស្រាយគ្រោះមហន្តរាយភ្នំភ្លើងនិងគ្រោះភូមិសាស្ត្រនៅឥណ្ឌូនេស៊ី មិនបានដំឡើងកម្រិតស្ថានភាពប្រកាសអាសន្នរបស់ភ្នំភ្លើង Semeru ទេដែលស្ថិតនៅកម្រិតខ្ពស់បំផុតទីបីចាប់តាំងពីវាបានផ្ទុះឡើងកាលពីខែឧសភាមក។ ភ្នំភ្លើងនេះបានព្រួសផេះក្តៅ3,000ម៉ែត្រឡើងទៅលើនៅដើមខែធ្នូ ដែលបង្កឱ្យអ្នកភូមិមានការភ័យស្លន់ស្លោយ៉ាងខ្លាំង។

ឥណ្ឌូនេស៊ីដែលជាប្រជុំកោះមានប្រជាជនជាង250លាននាក់ ស្ថិតនៅលើ “Ring of Fire” នៃមហាសមុទ្រប៉ាស៊ីហ្វិកគឺងាយនឹងមានការរញ្ជួយដីនិងការផ្ទុះភ្នំភ្លើង។ អ្នកជំនាញគ្រោះរញ្ជួយដីរបស់រដ្ឋាភិបាលតាមដានភ្នំភ្លើងសកម្មជាង120មកហើយ។

កាលពីព្រឹកថ្ងៃសុក្រនេះក៏មានការរញ្ជួយដីដ៏ខ្លាំងមួយបានធ្វើឱ្យកក្រើកកោះ Sulawesi របស់ឥណ្ឌូនេស៊ី ដោយបានសម្លាប់មនុស្សយ៉ាងហោចណាស់46នាក់៕

• បរិស្ថាន
• ទីកន្លែង
• ធម្មជាតិ
• អាកាសធាតុ