(update)៖ ចំនួនអ្នកស្លាប់ ដោយសារគ្រោះរញ្ជួយដី ក្នុងប្រទេសឥណ្ឌូនេស៊ី បានកើនឡើងដល់៧៨នាក់ហើយ

ហ្សាការតា៖ ភ្នាក់ងារជួយសង្គ្រោះ (Basarnas) បានប្រាប់ឱ្យដឹងកាលពីថ្ងៃអាទិត្យកន្លងទៅថា យ៉ាងហោចណាស់មានមនុស្ស៧៨នាក់បានស្លាប់ បន្ទាប់ពីគ្រោះរញ្ជួយដីមួយបានវាយប្រហារខេត្ត Sulawesi ខាងលិចនៃប្រទេសឥណ្ឌូនេស៊ីកាលពីថ្ងៃសុក្រ ទី១៥ កន្លងទៅ។​

ក្នុងនោះ យោងតាមរបាយការណ៍បានបង្ហាញថា មានមនុស្សជាង៧៤០នាក់បានរងរបួស និង២៧,៨០០នាក់បានចាកចេញពីទីលំនៅរបស់ពួកគេទៅរកកន្លែងដែលមានសុវត្ថិភាព បន្ទាប់ពីការរញ្ជួយដីកម្រិត៦.២រ៉ិចទ័របានប៉ះទង្គិចមកលើតំបន់របស់ពួកគេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ទន្ទឹមនឹងនោះដែរ​  ក្រុមប៉ូលិសនិងយោធាបានដាក់ពង្រាយអ្នកជួយសង្គ្រោះជាច្រើននាក់ឱ្យចុះទៅកន្លែងកើតហេតុ ដើម្បីជួយមនុស្សដែលជាប់នៅក្រោមគំនរបាក់បែក។

គួរជម្រាបដែរថា ប្រធានទីភ្នាក់ងារឧតុនិយមឥណ្ឌូនេស៊ីបានប្រាប់មកថា ការរញ្ជួយដីអាចនឹងកើតឡើងម្តងទៀត ដែលម្តងនេះវាអាចបង្កឱ្យមានរលកយក្សស៊ូណាមិ៕