ព្យុះព្រិលនៅជប៉ុន បង្កឱ្យ​រថយន្តចំនួន ១៣៤គ្រឿង បុកបន្តកន្ទុយគ្នានៅ​ផ្លូវល្បឿនលឿនមួយ

តូក្យូ៖ យ៉ាងហោចណាស់មានមនុស្សម្នាក់បានស្លាប់ និងជាច្រើននាក់រងរបួស ក្នុងហេតុការណ៍រថយន្តចំនួន ១៣៤គ្រឿង បុកបន្តកន្ទុយគ្នានៅក្នុងប្រទេសជប៉ុនកាលពីថ្ងៃអង្គារ ដែលបង្កឡើងដោយសារព្យុះព្រិលទឹកកកដ៏ធំមួយ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

រដ្ឋាភិបាល​​ជប៉ុនចេញសេចក្តីថ្លែងការណ៍ថា គ្រោះថ្នាក់ចរាចរណ៍នេះ បានកើតឡើងនៅ​​តាមបណ្តោយផ្លូវល្បឿនលឿន Tohoku Expressway ​ភាគខាងជើងខេត្ត Miyagi នៅវេលា​ថ្ងៃត្រង់​។ ក្នុងនោះដែរ មនុស្សចំនួន ២០០នាក់ បានជាប់គាំង​ក្នុងគំនរព្រិលទឹកកក ខណៈមនុស្ស ១២នាក់ ត្រូវបានបញ្ជូនទៅមន្ទីរពេទ្យ។

គួរជម្រាបថា ​តំបន់មួយក្នុងប្រទេសជប៉ុន មានព្រិលធ្លាក់ខ្លាំងខុសពីធម្មតា ក្នុងរយៈពេលប៉ុន្មានសប្តាហ៍ថ្មីៗនេះ។ ហើយបើទោះបីអាជ្ញាធរបានដាក់​កំណត់ល្បឿន ៥០គីឡូម៉ែត្រក្នុងមួយម៉ោង ដោយសារព្រិលធ្លាក់ខ្លាំង​យ៉ាងណាក៏ដោយ ប៉ុន្តែវាហាក់មិន​មានប្រសិទ្ធិភាពគ្រប់គ្រាន់ដើម្បីការពារគ្រោះមហន្តរាយទាំងនេះឡើយ៕