អាចម៍ផ្កាយធំៗចំនួន 6 នឹងហោះមកកៀកផែនដី ចំថ្ងៃស្បថចូលកាន់តំណែងរបស់លោក Biden

អាមេរិក៖ ថ្ងៃដែលលោក ចូ បៃដិន ក្លាយជាប្រធានាធិបតីអាមេរិកគឺជាថ្ងៃពិសេសមួយផងដែរ ដោយសារតែអាចម៍ផ្កាយជាច្រើននឹងហោះមកជិតនឹងភពផែនដីរបស់យើង ចំថ្ងៃដែលអ្នកប្រជាធិបតេយ្យរូបនេះស្បថចូលកាន់តំណែងនៅថ្ងៃពុធ (ម៉ោងសហរ​ដ្ឋ​អា​មេ​រិច)។

អង្គការណាសាបានកំណត់អត្តសញ្ញាណអាចម៍ផ្កាយចំនួន6 ដែលនឹងហោះកាត់ផែនដីនៅថ្ងៃស្បថចូលកាន់តំណែងរបស់លោក ចូបៃដិន។ ទីភ្នាក់ងារអវកាសនេះបានហៅថ្មអវកាសទាំងនេះថាជាវត្ថុជិតផែនដី (NEOs) ដែលមានន័យថាពួកវានឹងមកកៀកខ្លាំង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មន្ទីរពិសោធន៍ Jet Propulsion Laboratory របស់ណាសានិយាយថា៖ «NEOs គឺជាផ្កាយដុះកន្ទុយនិងអាចម៍ផ្កាយដែលត្រូវបានរុញច្រានដោយទំនាញភពផ្សេងៗដែលនៅក្បែរនោះ ឱ្យចូលទៅក្នុងគន្លងគោចរដែលធ្វើឱ្យពួកវាហោះចូលក្នុងតំបន់ជុំវិញផែនដី។»

ការមកជិតបំផុតរបស់វា យើងនឹងបានឃើញអាចម៍ផ្កាយមួយចូលមកកៀកជិតផែនដីខ្លាំងជាងព្រះចន្ទទៅទៀត ហើយអាចម៍ផ្កាយដែលឆ្លងកាត់ធំជាងគេបំផុតគឺមានទទឹងដល់ទៅ 93 ម៉ែត្រ។ ចម្លែកដែរ!​ ព្រោះវាហោះមកចំថ្ងៃស្បថចូលកាន់តំណែង ហើយរូបសំណាកសេរីភាពនៅញូវយ៉កក៏មានកម្ពស់ 93 ម៉ែត្រផងដែរ។

អាចម៍ផ្កាយទាំងអស់ត្រូវបានគេព្យាករណ៍ថានឹងហោះកាត់ភពផែនដីរបស់យើងដោយសុវត្ថិភាព ហើយបន្តដំណើរទៅមុខទៀតក្នុងលំហអាកាស។ ទោះយ៉ាងណាក៏ដោយ មជ្ឈមណ្ឌលរបស់ NASA សម្រាប់ការសិក្សាអំពីវត្ថុមកកៀកផែនដី នឹងតាមដានយ៉ាងដិតដល់ពីដំណើររបស់ពួកវា ដោយសារតែស្ថានភាព «កៀកខ្លាំង»។ ក្រុមតារាវិទូមានចំណាប់អារម្មណ៍យ៉ាងខ្លាំងចំពោះ NEOs ពីព្រោះពួកវាភាគច្រើនមិនមានការផ្លាស់ប្តូរសោះចាប់តាំងពីពេលដែលប្រព័ន្ធព្រះអាទិត្យកើតឡើងប្រហែល 4.6 ពាន់លានឆ្នាំមុន។

គួរបញ្ជាក់ផងដែរថា លោក ចូ បៃដិន នឹងស្បថចូលកាន់តំណែងនៅពាក់កណ្តាលថ្ងៃពុធ នៅទីក្រុងវ៉ាស៊ីនតោន៕

• វិទ្យាសាស្រ្ត
• ធម្មជាតិ