អារ៉ាប់រួម ចុះកិច្ចព្រមព្រៀងទិញយន្តហោះចម្បាំង​ ៥០គ្រឿង ពីសហរដ្ឋអាមេរិក

វ៉ាស៊ីនតោន៖ តាមការចុះផ្សាយរបស់សារព័ត៌មាន Reuters បានឱ្យដឹងថា ប្រទេសអារ៉ាប់រួម បានសម្រេចចុះកិច្ចព្រមព្រៀងជាមួយអាមេរិក ក្នុងការបញ្ជាយន្តហោះចម្បាំងប្រភេទ F-35 ចំនួន ៥០គ្រឿង រួមទាំងយន្តហោះគ្មានមនុស្សបើក (ដ្រូន) ចំនួន ១៨គ្រឿង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ប្រភពដដែលបន្តថា បើទោះបីអារ៉ាប់រួមនិងសហរដ្ឋអាមេរិកបានធ្វើការចុះហត្ថលេខាលើកិច្ចព្រមព្រៀងមុនពេលដែលលោក ចូ បៃដិន ចូលកាន់តំណែង​យ៉ាងណាក៏ដោយ ប៉ុន្តែប្រធានាធិបតីថ្មីនេះ​និយាយ​ថា លោកនឹងពិនិត្យមើលកិច្ចព្រមព្រៀងនេះឡើងវិញ។

អារ៉ាប់រួមដែលជាសម្ព័ន្ធមិត្តមជ្ឈឹមបូព៌ាជិតដិតបំផុតរបស់ទីក្រុងវ៉ាស៊ីនតោន បានបង្ហាញចំណាប់អារម្មណ៍ជាយូរមកហើយ ក្នុងបំណងចង់បានយន្តហោះបំបាំងកាយ F-35 ដែលផលិតដោយក្រុមហ៊ុនអាមេរិក Lockheed Martin ហើយក៏​ធ្លាប់​សន្យាថានឹងទិញវានៅក្នុងកិច្ចព្រមព្រៀង​ដាច់ដោយឡែកមួយ ​ ខណៈពេលដែលខ្លួន​បាន​ស្តាទំនាក់ទំនងជាមួយអ៊ីស្រាអែលឡើងវិញ កាលពីខែសីហា។

គួរជម្រាបថា កិច្ចព្រមព្រៀងនេះត្រូវបានចុះហត្ថលេខាប្រហែលមួយម៉ោង មុនពេលដែលលោក​ ចូ បៃដិន ស្បថចូលកាន់តំណែងជាប្រធានាធិបតីអាមេរិក។ ក្នុងនោះដែរ កាលបរិច្ឆេទនៃការដឹកជញ្ជូន​យន្តហោះចម្បាំង F-35 មិន​ទាន់ត្រូវបានបញ្ជាក់ជាផ្លូវការភ្លាមៗនោះទេ ប៉ុន្តែសំណើដំបូងដែល​គេបញ្ជូនទៅ ​បានបង្ហាញថា វាអាចនឹងធ្វើឡើងនៅឆ្នាំ ២០២៧៕