មុនចាកចេញពីសេតវិមាន លោក ត្រាំ បានបន្សល់ទុកលិខិតមួយច្បាប់ ជូនលោក បៃដិន

វ៉ាស៊ីនតោន៖ ប្រធានាធិបតីអាមេរិកទើបឡើងកាន់តំណែងថ្មី​ លោក ចូ បៃដិន បានបង្ហាញខ្លួននៅក្នុងការិយាល័យ Oval ជាលើកដំបូង​​នៅរសៀលថ្ងៃពុធកន្លងទៅ ដើម្បីចុះហត្ថលេខាលើបទបញ្ជាប្រតិបត្តិថ្មីៗ និងអានលិខិតសម្ងាត់មួយច្បាប់ ដែលអតីតប្រធាធិបតី លោក ដូណាល់ ត្រាំ ​បានបន្សល់ទុកសម្រាប់លោក។

លោក ​បៃដិន បានមានប្រសាសន៍​ខណៈពេលកំពុងចុះហត្ថលេខាលើបទបញ្ជាប្រតិបត្តិនៅក្នុងការិយាល័យថ្មីថា ​លោក ត្រាំ បានសរសេរលិខិត​ដ៏មានអត្ថន័យមួយច្បាប់ទុកសម្រាប់លោក ប៉ុន្តែដោយសារ​តែវាជារឿង​សម្ងាត់ ដូច្នេះ​លោកនឹងមិននិយាយអំពីរឿងនេះ​ទេ រហូតដល់លោកបាននិយាយជាមួយ​លោក ត្រាំ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកនាំពាក្យ​សេតវិមាន គឺលោក Judd Deere បានបញ្ជាក់ប្រាប់សារព័ត៌មាន Fox News ថា អតីតប្រធានាធិបតីលោក ​ត្រាំ បានទុកលិខិតមួយច្បាប់ដល់អ្នកស្នងតំណែងរបស់លោក នៅលើតុក្នុងការិយាល័យ ​Oval ​ទៅតាមប្រពៃណី។ ដោយឡែក មន្ត្រីសេតវិមានមួយរូបទៀតក៏បានឱ្យដឹងដែរថា អនុប្រធានាធិបតីអាមេរិក លោក Mike Pence ក៏បានបន្សល់ទុកលិខិតមួយច្បាប់សម្រាប់លោក បៃដិន ​និងអនុប្រធានាធិបតីថ្មី គឺលោកស្រី ខាម៉ាឡា ហារីស ផងដែរ។

គួរ​ឱ្យដឹងដែរថា លោក ត្រាំ គឺជាប្រធានាធិបតីទីមួយក្នុងប្រវត្តិសាស្ត្រអាមេរិក ​ ដែលត្រូវបានសភារៀបចំនីតិវិធី ទាញទម្លាក់ចេញពីតំណែងប្រធានាធិបតីដោយ​ចោទប្រកាន់លោកថា ជាបុគ្គលគំរាមកំហែងដល់លទ្ធិប្រជាធិបតេយ្យអាមេរិក។ ​បន្ថែមពីនេះ លោកក៏បានបំផ្លាញប្រពៃណីដែលមានអាយុកាលជាយូរយារមកហើយ ​ ដោយការ​មិនចូលពិធីផ្ទេរអំណាចដោយសន្តិវិធីទៅឱ្យប្រធានាធិបតី​បន្ទាប់៕