កម្របានឃើញ! ទេពច្យុតភ្លឺចិញ្ចាច ប្រទះឃើញហោះកាត់ប្រទេសជប៉ុន (មានវីដេអូ)

តូក្យូ៖ ប្រជាជននៅ​តំបន់ជាច្រើន​ក្នុងប្រទេសជប៉ុនបាន​ឱ្យដឹងថា ពួកគេបានប្រទះឃើញនូវអ្វីដែលមើលទៅដូចជាទេពច្យុតដ៏ភ្លឺ​ចិញ្ចាច ​​បានហោះជ្រែកផ្ទៃមេឃ​កាលពីយប់ថ្ងៃពុធកន្លងទៅ។ ​

សាក្សី​ជាច្រើន​នាក់ដែលបានឃើញបាតុភូតកម្រនេះ​នៅទីតាំងផ្សេងៗរួមមានតំបន់ Kanto តំបន់ Tokai និង Kinki បាននាំគ្នាចែករំលែកភាពភ្ញាក់ផ្អើលនៅលើបណ្តាញសង្គម។ ក្នុងនោះដែរ ខ្សែវីដេអូដែលថតដោយកាមេរ៉ា​មួយ នៅភាគខាងលិច​ទីក្រុង Osaka ​បានបង្ហាញឱ្យឃើញទេពច្យុតដ៏ភ្លឺ ហោះក្នុងរយៈពេលជាច្រើនវិនាទី ​ នាវេលាម៉ោងប្រហែល ៨:៣០យប់ នៅប្រទេសជប៉ុន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យ៉ាងណាមិញ លោក Fujii Daichi ដែលជាអ្នកជំនាញខាងផ្នែកតារាសាស្ត្រនៅសារមន្ទីរ Hiratsuka ជិតទីក្រុងតូក្យូបាននិយាយថា លោកជឿជាក់ថាវាជាបំណែកនៃអាចម៍ផ្កាយមួយ ដែលបានឆេះនៅក្នុងបរិយាកាសផែនដី។ លោក​បន្តថា ទេពច្យុតបាន​ហោះក្នុងល្បឿនយឺតបើប្រៀបធៀបទៅនឹងអាចម៍ផ្កាយធម្មតា ប៉ុន្តែវា​មានពន្លឺភ្លឺខ្លាំងដូចដួងច័ន្ទដូច្នោះដែរ៕