តៃវ៉ាន់​បង្ហាញសាច់ដុំត្រៀមខ្លួនជាស្រេច បន្ទាប់ពីចិនដឹកនាំយន្តហោះមួយកងធំ​ ចូលលុកលុយដែនអាកាសរបស់ខ្លួន

តៃប៉ិ៖ ខណៈពេលដែលភាពតានតឹងជាមួយមហាយក្សចិន កំពុងតែឡើងកម្តៅកាន់តែខ្លាំង កោះតៃវ៉ាន់បានបង្ហាញសាច់ដុំ​ដោយការធ្វើ​សមយុទ្ធ​លើដែនអាកាសរបស់ខ្លួននៅថ្ងៃអង្គារនេះ ក្នុងទម្រង់នៃការធ្វើសង្គ្រាមផ្សេងៗដើម្បីបង្ហាញពីការត្រៀមខ្លួនជាស្រេច ក្រោយ​ពីយន្តហោះចម្បាំងចិនរាប់សិបគ្រឿង បានហោះចូលតំបន់ការពារដែនអាកាសរបស់កោះនេះ​បន្តបន្ទាប់។

តៃវ៉ាន់ដែលជាដែនកោះតូចនៅកៀកនឹងប្រទេសចិន បាននឹងកំពុងបង្ហាញការព្រួយបារម្ភ ​ចាប់តាំងពីមានការលុកលុយទ្រង់ទ្រាយធំដោយ​យន្តហោះចម្បាំងនិងយន្តហោះទម្លាក់គ្រាប់បែកចិន ចូលទៅ​ភាគនិរតីនៃតំបន់កំណត់អត្តសញ្ញាណការពារអាកាសរបស់ខ្លួនកាលពីថ្ងៃសៅរ៍និងថ្ងៃអាទិត្យ ស្របពេលក្រុមនាវាដឹកយន្តហោះចម្បាំងសហរដ្ឋអាមេរិក បើកលូនលយចូលមកកាន់តំបន់សមុទ្រចិនខាងត្បូង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

​យ៉ាងណាមិញ ភាគីចិននៅមិនទាន់បានផ្តល់ការពន្យល់ជាសាធារណៈ ចំពោះ​សកម្មភាពហោះហើរទ្រង់ទ្រាយធំនៃកងយន្តហោះរបស់ខ្លួន កាលពីចុងសប្តាហ៍កន្លងទៅនេះនៅឡើយទេ។ ហើយទន្ទឹមនឹងនោះ ទីក្រុងវ៉ាស៊ីនតោនក៏បាន​អំពាវនាវឱ្យចិនបញ្ឈប់ការដាក់សម្ពាធលើកោះតៃវ៉ាន់ និងបញ្ជាក់ជាថ្មីនូវការប្តេជ្ញាចិត្តរបស់ខ្លួន ចំពោះការការពារដែនកោះប្រជាធិបតេយ្យមួយនេះ។

ជុំវិញបញ្ហានេះដែរ វរសេនីយ៍ឯក Lee Ching-shi បានលើកឡើងថា ខណៈដែនអាកាសកោះតៃវ៉ាន់កំពុងរងការគំរាមកំហែង យន្តហោះចម្បាំងតៃវ៉ាន់គ្រប់ប្រភេទ បានបំពាក់អាវុធទំនើបៗរួចជាស្រេច ដើម្បីត្រៀមឆ្លើយតបរាល់សកម្មភាពឈ្លានពានរបស់យន្ដហោះចិន​ ហើយកងកម្លាំង​តៃវ៉ាន់ ​ក៏បានប្តេជ្ញាថានឹងការពារដែនកោះមួយនេះឱ្យខាងតែបាន។

គួរឱ្យដឹងដែរថា កងទ័ពអាកាសតៃវ៉ាន់ទទួលបានការបណ្តុះបណ្តាលយ៉ាង​ស្ទាត់ជំនាញ ប៉ុន្តែ​បើទោះជាយ៉ាងណាក្តី ដែនកោះមួយនេះមានចំនួនយន្តហោះចម្បាំងតិចខ្លាំងណាស់ បើធៀបជាមួយនឹងប្រទេសចិន៕