មនុស្សបីនាក់ចំណាយ 55លានដុល្លារ សម្រាប់ការហោះហើរឯកជនលើកដំបូងទៅកាន់ស្ថានីយអវកាស តាមយាន SpaceX

បរទេស៖ ការហោះហើរទៅកាន់ស្ថានីយអវកាសជាលក្ខណៈឯកជនដំបូង ត្រូវបានគេប្រកាសកាលពីថ្ងៃអង្គារ ដោយមានបុរសបីនាក់ ដែលម្នាក់ៗចំណាយ55លានដុល្លារ ដើម្បីធ្វើដំណើរតាមរ៉ុក្កែតរបស់ SpaceX ។

ពួកគេនឹងត្រូវដឹកនាំដោយអតីតអវកាសយានិករបស់អង្គការណាសា Michael Lopez-Alegria ដែលឥឡូវនេះធ្វើការឱ្យក្រុមហ៊ុន Axiom Space ដែលជាក្រុមហ៊ុនរៀបចំការហោះហើរនេះ នៅខែមករាឆ្នាំក្រោយ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

 លោក Mike Suffredini នាយកប្រតិបត្តិនិងជាប្រធានក្រុមហ៊ុន Axiom បានមានប្រសាសន៍ថា នេះជាការហោះហើរឯកជនលើកដំបូងទៅកាន់ស្ថានីយអវកាសអន្តរជាតិ។ វាមិនធ្លាប់មានពីមុនមកទេ។

Suffredini បានប្រាប់ Associated Press. ថាខណៈដែលអ្នកដឹកនាំបេសកកម្មនេះ លោក Michael Lopez-Alegria ជាមនុស្សល្បីក្នុងផ្នែកអវកាស បុរសបីនាក់ផ្សេងទៀតគ្រាន់តែជាមនុស្សធម្មតាដែលចង់ឡើងទៅទីអវកាសប៉ុណ្ណោះ ហើយយើងបានផ្តល់ឱកាសនោះឱ្យពួកគេ។

ក្រុមអ្នកធ្វើដំណើរដំបូងនេះនឹងចំណាយពេល8ថ្ងៃនៅលើស្ថានីយអវកាស ដែលពួកគេត្រូវចំណាយពេល1ឬ2 ថ្ងៃដើម្បីទៅដល់ទីនោះដោយជិះយានអវកាស SpaceX Dragon ដែលហោះចេញពី Cape Canaveral ក្នុងរដ្ឋ Florida សហរដ្ឋអាមេរិក។

អតិថិជនទាំងបីដំបូងរបស់ Axiom នេះរួមមាន លោក Larry Connor ដែលជាសហគ្រិនផ្នែកអចលនទ្រព្យនិងបច្ចេកវិទ្យាមកពី Dayton, Ohio លោក Mark Pathy អ្នកហិរញ្ញវត្ថុជនជាតិកាណាដា និងអ្នកជំនួញអ៊ីស្រាអែលលោក Eytan Stibbe។

អវកាសយានិកឯកជនម្នាក់ៗត្រូវឆ្លងកាត់ការធ្វើតេស្តវេជ្ជសាស្ត្រ ហើយនឹងទទួលបានការបណ្តុះបណ្តាលរយៈពេល15សប្តាហ៍។ លោក Larry Connor អាយុ70ឆ្នាំនឹងក្លាយជាមនុស្សចាស់ជាងគេទី2 ដែលហោះហើរនៅទីអវកាស បន្ទាប់ពីលោក John Glenn ក្នុងឆ្នាំ1998 ក្នុងអាយុ77ឆ្នាំ៕

• វិទ្យាសាស្រ្ត
• ជំនួញ