ទំនើបមែន! ក្រុមហ៊ុនបច្ចេកវិទ្យារុស្ស៊ី តេស្តសាកល្បងតាក់ស៊ីហោះមួយប្រភេទ និងត្រៀមផលិត​ក្នុងទ្រង់ទ្រាយធំ​ឆាប់ៗនេះ (មានវីដេអូ)

​ម៉ូស្គូ៖ កាលពីថ្ងៃទី ២៥ ខែមករា Hoversurf ដែលជាក្រុមហ៊ុនបច្ចេកវិទ្យា​រុស្ស៊ី បានចាប់ផ្តើមតេស្តសាកល្បងតាក់ស៊ីហោះរបស់ខ្លួនមួយប្រភេទឈ្មោះថា Hover drone taxi ដែល​នឹងអាចប្រើប្រាស់សំរាប់ដឹកអ្នកដំណើរ និងដឹកទំនិញបានយ៉ាងងាយស្រួល។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

តាមការបញ្ជាក់របស់ទីភ្នាក់ងារសារព័ត៌មាន TASS បានឱ្យដឹងថា តាក់ស៊ីទំនើបនេះមានទំហំ ៥ម៉ែត្រ x ១.៦ម៉ែត្រ អាចហោះឡើងដល់កម្ពស់ ១៥០ម៉ែត្រ និងអាច​ធ្វើដំណើរដល់ ១០០គីឡូម៉ែត្រក្នុងមួយជើង។ តាក់ស៊ី Hover មិនតម្រូវឱ្យមានការសាងសង់ផ្លូវរត់ពិសេសនោះទេ ព្រោះវាអាចចុះចតតាមចំណតរថយន្តធម្មតា។ វាអាចដឹកមនុស្សបានពីរនាក់ ឬដឹកទំនិញរហូតដល់ ៣០០គីឡូក្រាម និង​អាចហោះក្នុងល្បឿន​ ២០០គីឡូម៉ែត្រក្នុងមួយម៉ោង។

បច្ចុប្បន្ន តាក់ស៊ី Hover ​កំពុងត្រូវបានសាកល្បង​នៅក្នុងពហុកីឡដ្ឋាន Luzhniki ក្នុងទីក្រុងម៉ូស្គូ។ ហើយក្នុងនោះ រដ្ឋាភិបាលទីក្រុងមូស្គូ​ក៏កំពុងបង្ហាញគម្រោងបង្កើត​ទីតាំងថ្មីមួយ នៅ Skolkovo សំរាប់ការសាកល្បង​តាក់ស៊ីនេះ ដោយបំពាក់ជាមួយបណ្តាញ 5G ​ក៏ដូចជាធ្វើឱ្យ​ប្រសើរឡើងនូវប្រព័ន្ធបញ្ជា​ AI ដើម្បីងាយស្រួលដល់ការមើលទិសដៅ ​ និងធានាសុវត្ថិភាពក្នុងការហោះហើរ។

គួរ​ជម្រាបថា តាក់ស៊ីហោះ Hover ត្រូវបានគេរំពឹងថា នឹងចូលផលិតកម្មទ្រង់ទ្រាយធំនៅដំណាច់​ឆ្នាំ ២០២១នេះ។ ប៉ុន្តែបើទោះជាយ៉ាងណាក៏ដោយ ពួក​វានឹង​ត្រូវបានគេដាក់ឱ្យប្រើប្រាស់ទូលំទូលាយនៅឆ្នាំ ២០២៣-២០២៥ គឺនៅពេលដែលប្រទេសរុស្ស៊ីរៀបចំបណ្តាញ 5G ក៏ដូចជាអនុម័តច្បាប់រួចរាល់ ក្នុងការ​អនុញ្ញាតឱ្យ​ប្រើ​តាក់ស៊ីហោះនេះ៕

• វិទ្យាសាស្រ្ត
• ឡាន
• វីដេអូ