រថយន្ដក្រុងគ្មានមនុស្សបើកដំបូងបង្អស់របស់អាមេរិកខាងជើង គ្រោងនឹងដាក់ដឹកជញ្ជូនអ្នកដំណើរហើយ (មានវីដេអូ)

បរទេស៖ ក្រុមហ៊ុនផលិតរថយន្តដឹកអ្នកដំណើរដែលមានមូលដ្ឋាននៅរដ្ឋ Minnesota ទើបតែបានបង្ហាញនូវ រថយន្តក្រុងគ្មានមនុស្សបើកដំបូងគេរបស់អាមេរិកខាងជើង។

រថយន្តក្រុង Xcelsior AV ប្រវែង៤១ហ្វីត (១២ ម៉ែត្រ) របស់ក្រុមហ៊ុន New Flyer មានកៅអីអង្គុយ៤០កៅអី ដោយមានកន្លែងសម្រាប់ឱ្យអ្នកដំណើរឈរ និងពីរកន្លែងសម្រាប់រទេះអ្នកពិការ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

រថយន្តអគ្គិសនីនេះប្រើបច្ចេកវិទ្យា AutoDrive ដើម្បីបង្កើតគំរូ3D ៣៦០ដឺក្រេនៃបរិស្ថានជុំវិញវាតាមរយៈ LIDAR រ៉ាដានិងកាមេរ៉ាជាច្រើន ដែលក៏អាចរកឃើញអ្នកថ្មើរជើង យានយន្ត និងឧបសគ្គផ្សេងៗទៀតដែលនៅជុំវិញ។

New Flyer បានដាក់ចេញនូវកម្មវិធីសាកល្បងជាមួយក្រសួងដឹកជញ្ជូនរដ្ឋ Connecticut រួចហើយ ដោយនឹងដាក់ឡានក្រុង Xcelsior ជាច្រើនគ្រឿងដឹកអ្នកដំណើរនៅតាមបណ្តោយផ្លូវឆ្លងកាត់ទីក្រុង New Britain និងទីក្រុង Hartfort របស់រដ្ឋ Connecticut។  

យោងទៅតាមក្រុមហ៊ុន New Flyer រថយន្តក្រុង Xcelsior គឺជារថយន្តស្វ័យប្រវត្តិកម្មបើកដោយខ្លួនឯងកម្រិត៤។ សមាគមវិស្វករយានយន្ត (The Society of Automotive Engineers) មានមាត្រដ្ឋានប្រាំចំណុចសម្រាប់រថយន្តស្វ័យប្រវត្តិកម្ម ចាប់ពីកម្រិត១ ដែលមានការគ្រប់គ្រងតិចតួចពីមនុស្សដូចជាការចាប់ហ្វ្រាំង រហូតដល់កម្រិត៥ គឺស្វ័យប្រវត្តិកម្មពេញលេញ ដែលប្រព័ន្ធវាអាចគ្រប់គ្រងបានគ្រប់លក្ខខណ្ឌអាកាសធាតុ ភ្លើងសញ្ញា និងចរាចរណ៍ ដោយគ្មានអន្តរាគមន៍ពីមនុស្សសោះ។  

តាមស្តង់ដារឧស្សាហកម្មកម្រិត៤ គឺរថយន្តនោះអាចបើកបរដោយខ្លួនឯងនៅក្នុងតំបន់ដែលបានកំណត់ទុកជាមុន ដោយមិនមែននៅគ្រប់តំបន់ និងលក្ខខណ្ឌទាំងអស់នោះទេ ដែលនេះជាកម្រិតដែលគេអាចរថយន្តនោះបានថា  បើកបរដោយខ្លួនឯង។

នៅក្នុងវីដេអូខាងក្រោម គេឃើញថាមានមនុស្សម្នាក់អង្គុយនៅពីក្រោយដៃចង្កូតរបស់ឡានក្រុង Xcelsior ទោះបីជាគាត់មិនបានប៉ះវាក៏ដោយ៕

• វិទ្យាសាស្រ្ត
• ឡាន