ក្រុមហ៊ុន Apple នឹងវិនិយោគទឹកប្រាក់៣.៦ពាន់លានដុល្លារ ទៅក្រុមហ៊ុន Kia Motors ដើម្បីផលិតរថយន្ត Apple Car

បរទេស៖ ក្រុមហ៊ុន Apple នឹងវិនិយោគទឹកប្រាក់ចំនួន៤ទ្រីលានវ៉ុន (៣.៦ ពាន់លានដុល្លារ) ទៅក្រុមហ៊ុន Kia Motors ក្នុងការសហការគ្នាដើម្បីផលិតរថយន្តអគ្គិសនី។

នេះបើយោងតាមរបាយការណ៍របស់សារព័ត៌មានកូរ៉េ DongA Ilbo (តាមរយៈ Bloomberg) ដែលបានអះអាងថាកិច្ចព្រមព្រៀងមួយអាចនឹងត្រូវបានចុះហត្ថលេខានៅថ្ងៃទី១៧ ខែកុម្ភៈ។ យោងតាមរបាយការណ៍បានឱ្យដឹងថាផែនការនេះគ្រោងនឹងដាក់លក់រថយន្ត Apple Car នៅឆ្នាំ២០២៤ ដោយមានគោលដៅក្នុងការផលិតរថយន្តដំបូង១០០,០០០គ្រឿងក្នុងមួយឆ្នាំ។ របាយការណ៍នេះអះអាងថា ក្រោយៗមកទៀតគេអាចនឹងពង្រីកដល់ទៅ៤០០,០០០គ្រឿង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មូលនិធិរបស់ក្រុមហ៊ុន Apple នឹងត្រូវប្រើសម្រាប់សាងសង់រោងចក្រផ្តាច់មុខសម្រាប់ការផលិតនិងអភិវឌ្ឍរថយន្ត Apple។

របាយការណ៍នេះធ្វើឡើងបន្ទាប់ពីមានរបាយការណ៍ខែមករាដែលថាក្រុមហ៊ុន Apple កំពុងពិភាក្សាជាមួយក្រុមហ៊ុន Hyundai អំពីការផលិតរថយន្ត Apple ដែលក្រុមហ៊ុន Hyundai បានបញ្ជាក់រួចមកហើយ។ មុនដំបូងក្រុមហ៊ុនបាននិយាយថា ការពិភាក្សាគឺនៅដំណាក់កាលដំបូងនៅឡើយ ហើយថាមិនទាន់បានសម្រេចអ្វីទេ។ ក្រោយមកស្រាប់តែក្រុមហ៊ុន Hyundai បានកែសម្រួលសេចក្តីថ្លែងការណ៍នេះ ដោយគ្រាន់តែបញ្ជាក់ថាខ្លួនបាននិយាយជាមួយដៃគូអំពីការបង្កើតរថយន្តអគ្គិសនីស្វយ័ត ហើយមិនបាននិយាយថាជា Apple នោះទេ។ 

ឥឡូវនេះក្រុមហ៊ុន Kia  (ដែលជាកម្មសិទ្ធិមួយផ្នែករបស់ក្រុមហ៊ុន Hyundai) និងក្រុមហ៊ុន Apple បានបដិសេធមិនធ្វើអត្ថាធិប្បាយលើព័ត៌មាននេះទេ។

គួរបញ្ចាក់ផងដែរថា ភាគហ៊ុនរបស់ក្រុមហ៊ុន Kia Motors បានកើនឡើង១៤.៥% បន្ទាប់ពីព័ត៌មានវិនិយោគនេះលេចចេញភ្លាម៕

• ជំនួញ
• ឡាន