ស្ត្រីកេនយ៉ាម្នាក់ រកឃើញវិធីកែច្នៃសំរាមប្លាស្ទិចទៅជាឥដ្ឋដែលរឹងមាំជាងបេតុងទៀត (មានវីដេអូ)

កេនយ៉ា៖ ដោយប្រើភាពប៉ិនប្រសប់ និងជំនាញវិស្វកម្មរបស់នាង Nzambi Matee បានរកឃើញវិធីមួយដើម្បីជួយបរិស្ថាន គឺបំលែងកាកសំណល់ប្លាស្ទិកទៅជាសម្ភារៈសំណង់។

នៅឆ្នាំ២០១៧ Matee បានបើករោងចក្រមួយនៅរដ្ធធានី Nairobi ឈ្មោះថា Gjenge Makers ដែលកម្មករយកកាកសំណល់ប្លាស្ទិកលាយជាមួយដីខ្សាច់ហើយកំដៅវាឡើង ចុងក្រោយវាក៏បានចេញជាឥដ្ឋដែលរឹងខ្លាំងជាងបេតុងរហូតដល់៥ទៅ៧ដង។ កញ្ញា Matee បានប្រាប់ Reuters ថា រោងចក្ររបស់នាងរទទួលយកកាកសំណល់ដែលកន្លែងផ្សេងទៀតមិនអាចកែច្នៃឡើងវិញបាន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឥដ្ឋទាំងនោះត្រូវបានធ្វើពីផ្លាស្ទិចដែលបានមកពីដបទឹកដោះគោ ដបសាប៊ូកក់សក់ ថង់គ្រាប់ធញ្ញជាតិ ថង់សាំងវិច ធុង និងខ្សែពួរ។ ជារៀងរាល់ថ្ងៃ រោងចក្រ Gjenge Makers ផលិតឥដ្ឋប្រហែល១៥០០ឥដ្ឋ មានទំហំនិងពណ៌ខុសៗគ្នា។ Matee គឺជាវិស្វករវត្ថុធាតុម្នាក់ ហើយនាងបានរចនាម៉ាស៊ីនរបស់រោងចក្រនេះ ដោយសារតែនាងដឹងថាមិនអាចរង់ចាំជំនួយណាមួយបាន ព្រោះគ្មានក្រុមមន្ត្រីរដ្ឋាភិបាលណាមួយអើពើពីរឿងការបំពុលប្លាស្ទិចសោះ។ នាងបានប្រាប់ Reuters ថា «ខ្ញុំធុញទ្រាន់នឹងរង់ចាំ»។

ចាប់តាំងពីបើកមក រោងចក្រ Gjenge Makers បានកែច្នៃកាកសំណល់ប្លាស្ទិកចំនួន២០តោន ហើយ Matee គ្រោងនឹងបន្ថែមខ្សែសង្វាក់ផលិតកម្មធំជាងមុន ដែលនឹងអនុញ្ញាតឱ្យរោងចក្រផលិតបានបីដងនៃការផលិត៕

• បរិស្ថាន
• វិទ្យាសាស្រ្ត
• វីដេអូ