យានស្រាវជ្រាវ Tianwen-1 របស់ចិន ថតបញ្ជូនរូបភាពភពអង្គារដំបូងរបស់ខ្លួន និងត្រៀមចុះចតបំពេញបេសកកម្ម

ចិន៖ ទីភ្នាក់ងារអវកាសចិនបាននិយាយថាយានស្រាវជ្រាវ Tianwen-1 របស់ប្រទេសចិន បានបញ្ជូនរូបភាពដំបូងរបស់ភពអង្គារមក។ 

Tianwen-1 ដែលឈ្មោះនេះមានន័យថា «ដំណើរស្វែងរកការពិតនៃឋានសួគ៌» (Quest for Heavenly Truth) បានបញ្ជូនរូបភាពសខ្មៅរបស់ភពក្រហមមួយនេះ ដែលត្រូវបានថតនៅពេលដែលយានស្រាវជ្រាវស្ថិតនៅចម្ងាយប្រហែល2.2លានគីឡូម៉ែត្រពីភពអង្គារ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យានស្រាវជ្រាវភពអង្គារ Tianwen-1 គឺជាបេសកកម្មលើកដំបូងរបស់ចិនទៅកាន់ភពអង្គារ បានបង្ហោះចេញកាលពីខែកក្កដាឆ្នាំមុន។ Tianwen-1 នឹងធ្វើដំណើរជុំវិញភពនេះមុននឹងចុះចតលើផ្ទៃរបស់ភព ដោយមានគោលបំណងប្រមូលព័ត៌មានសំខាន់ៗអំពីដីភពអង្គារ លក្ខណៈភូមិសាស្ត្រ បរិស្ថាន បរិយាកាស និងស្វែងរកប្រភពទឹក។

យាននេះត្រៀមនឹងទៅដល់គន្លងគោចររបស់ភពអង្គារនៅប្រហែលថ្ងៃទី10  ខែកុម្ភៈ។

Tianwen-1 គឺជាបេសកកម្មមួយក្នុងចំណោមបេសកកម្ម3ទៅភពអង្គារ ដែលបានបង្ហោះកាលពីខែកក្កដាឆ្នាំមុន រួមជាមួយយាន Perseverance rover របស់អង្គការណាសាដែលនឹងចុះចតនៅលើភពអង្គារនៅថ្ងៃទី18 ខែកុម្ភៈ និងយាន Hope របស់អារ៉ាប់រួមដែលនឹងធ្វើដំណើរជុំវិញភពនេះ ហើយនឹងចូលទៅកាន់គន្លងគោចរនៅថ្ងៃទី9 ខែកុម្ភៈ។

បេសកកម្មទាំងបីបានចេញដំណើរការក្នុងពេលតែមួយ ដោយសារតែការមកជិតគ្នារវាងភពអង្គារនិងភពផែនដីនៅចំហៀងតែមួយនៃព្រះអាទិត្យ ដែលធ្វើឱ្យការធ្វើដំណើរទៅកាន់ភពក្រហមនេះកាន់តែលឿនជាងមុន៕

• វិទ្យាសាស្រ្ត
• រូបភាព