លោកតាអាយុ70ឆ្នាំម្នាក់បំបែកឯតទគ្គកម្ម​ពិភពលោក ចែវទូក5,000គីឡូម៉ែត្រឆ្លងកាត់មហាសមុទ្រអាត្លង់ទិច

អង់គ្លេស៖ លោកតាម្នាក់បានក្លាយជាមនុស្សចំណាស់ជាងគេដែលបានចែវទូកចម្ងាយ ៣,០០០ ម៉ាយល៍ (៥,០០០ គម) តែម្នាក់ឯងគត់នៅលើមហាសមុទ្រអាត្លង់ទិច ដោយរៃអង្គាសប្រាក់បានច្រើនជាង ៦៤០,០០០ ផោន សម្រាប់ការស្រាវជ្រាវជំងឺវង្វេង​ (dementia)។ 

លោកតា Frank Rothwell អាយុ៧០ឆ្នាំមកពីក្រុង Oldham ប្រទេសអង់គ្លេស បានចែវទូកចេញពីតំបន់ La Gomera នៅកោះ Canary កាលពីថ្ងៃទី១២ ខែធ្នូ និងបានចែវមកដល់ទីផ្តាច់ព្រ័ត្រនៅកោះ Antigua ក្នុងតំបន់ Caribbean កាលពីថ្ងៃសៅរ៍ ដោយបានជួបជុំជាមួយលោកយាយ Judith ភរិយារបស់គាត់ដែលមានអាយុ៥០ឆ្នាំ ខណៈដែលថ្ងៃនៃសេចក្តីស្រឡាញ់ជិតមកដល់ល្មម។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកតាបាននិយាយថា ការឆ្លងកាត់មកដល់ទីផ្តាច់ព្រ័ត្រគឺជារឿងដ៏អស្ចារ្យមួយ ស្របពេលដែលគាត់រៃអង្គាសប្រាក់បានជាង ៦៤៨,០០០ ផោនសម្រាប់ការស្រាវជ្រាវជំងឺវង្វេងស្មារតី របស់ចក្រភពអង់គ្លេស (Alzheimer’s Research UK) ដើម្បីជាការរំលឹកដល់ប្អូនថ្លៃប្រុសរបស់គាត់គឺលោក Roger ដែលបានទទួលមរណភាពដោយសារជំងឺ Alzheimer ក្នុងអាយុ៦២ឆ្នាំ ចំពេលដែលលោកតាកំពុងធ្វើការចែវទូកនេះ។

លោកតាបានចំណាយពេល៦សប្តាហ៍ដើម្បីចែវឆ្លងកាត់មហាសមុទ្រអាត្លង់ទិច និងប្រើពេលជាង១៨ខែដើម្បីហ្វឹកហាត់និងរៀបចំ ហើយលោកតាបាននិយាយថាមានមោទកភាពចំពោះអ្វីដែលបានសម្រេចនិងការធ្វើដំណើរដែលមិនគួរអោយជឿនេះ។

លោកស្រី Hilary Evans ប្រធាននាយកប្រតិបត្តិនៃ Alzheimer’s Research UK បាននិយាយថា៖ «យើងពិតជារំជួលចិត្តចំពោះការប្តេជ្ញារបស់ Frank ដើម្បីរៃអង្គាសប្រាក់១លានផោនសម្រាប់ការស្រាវជ្រាវជំងឺវង្វេង។ ដោយទទួលយកនូវការប្រកួតប្រជែងដ៏ធំធេងបែបនេះនៅអាយុ៧០ឆ្នាំ គាត់បានជួយផ្សព្វផ្សាយការយល់ដឹង និងជំរុញទឹកចិត្តមនុស្សគ្រប់វ័យឱ្យហ៊ានធ្វើបែបនេះដែរ។» 

លោកតាផ្សងព្រេងម្នាក់នេះក៏ធ្លាប់បានចំណាយពេល៥សប្តាហ៍នៅលើកោះស្ងាត់មួយ ថតឱ្យកម្មវិធីទូរទស្សន៍ Bear Grylls ហើយបានចែវទូកដែលមានឈ្មោះថា Never Too Old (មិនចាស់ក្នុងការធ្វើអ្វីមួយ)៕

• ទីកន្លែង
• វិទ្យាសាស្រ្ត
• ជំរុញទឹកចិត្ត