ក្រុមហ៊ុន Tesla ទិញ bitcoin ចំនួន១.៥ពាន់លានដុល្លារ និងគ្រោងទទួលយក​ bitcoin ជាការទូទាត់ប្រាក់ពេលទិញរថយន្ត

បរទេស៖ ក្រុមហ៊ុន Tesla បានប្រកាសនៅថ្ងៃច័ន្ទថា ខ្លួនបានទិញ bitcoin ចំនួន1.5ពាន់លានដុល្លារ។

នៅក្នុងឯកសារជាមួយគណៈកម្មការមូលប័ត្រ ក្រុមហ៊ុនបាននិយាយថាខ្លួនបានទិញ bitcoin សម្រាប់ភាពបត់បែនបន្ថែមទៀត និងទទួលបានផលចំណេញជាអតិបរមាពីសាច់ប្រាក់។ ក្រុមហ៊ុន Tesla ក៏បាននិយាយផងដែរថាខ្លួននឹងចាប់ផ្តើមទទួលយកការទូទាត់ប្រាក់ជា bitcoin ពីអតិថិជនក្នុងការទិញផលិតផលរបស់ខ្លួន។ ការធ្វើបែបនេះនឹងធ្វើឱ្យក្រុមហ៊ុន Tesla ក្លាយជាក្រុមហ៊ុនផលិតរថយន្តធំដំបូងគេដែលទទួលយក bitcoin ក្នុងការទូទាត់ប្រាក់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ដំណឹងនេះបានធ្វើឱ្យមានសំណួរចោទឡើងភ្លាមៗជុំវិញទង្វើរបស់នាយកប្រតិបត្តិ Elon Musk នៅលើបណ្តាញសង្គម Twitter កាលពីប៉ុន្មានសប្តាហ៍ថ្មីៗនេះ ដែលគាត់ត្រូវបានគេសរសើរចំពោះការដំឡើងថ្លៃរូបិយប័ណ្ណឌីជីថលដូចជា bitcoin និង dogecoin តាមរយៈការបង្ហោះសារវិជ្ជមានដែលបានលើកទឹកចិត្តឱ្យមនុស្សកាន់តែច្រើនទិញរូបិយប័ណ្ណឌីជីថលទាំងនោះ។

កាលពីពីរសប្តាហ៍មុនមហាសេដ្ឋីក្រុមហ៊ុន Tesla រូបនេះបានដាក់ hashtag #bitcoin នៅលើ Twitter របស់គាត់ក្នុងចលនាមួយដែលបានជួយជំរុញតម្លៃរូបិយប័ណ្ណឌីជីថលឱ្យកើនដល់ទៅ20ភាគរយ។ ពីរថ្ងៃក្រោយមក គាត់បាននិយាយនៅលើកម្មវិធី Clubhouse ថា៖ «ខ្ញុំគិតថា bitcoin គឺជារឿងល្អ ហើយខ្ញុំជាអ្នកគាំទ្រ bitcoin។»

បន្ទាប់ពីការប្រកាសរបស់ក្រុមហ៊ុន Tesla នេះភ្លាម តម្លៃ Bitcoin បានកើនឡើងដល់កម្រិតខ្ពស់ថ្មីកាលពីថ្ងៃច័ន្ទ ឈានដល់តម្លៃយ៉ាងហោចណាស់44,200ដុល្លារ។ ភាគហ៊ុនរបស់ក្រុមហ៊ុន Tesla បានកើនឡើងជាង2.5ភាគរយ។ ក្រុមហ៊ុន Tesla ក៏បានព្រមានវិនិយោគិនអំពីភាពប្រែប្រួលនៃតម្លៃ bitcoin នៅក្នុងឯកសាររបស់ខ្លួនផងដែរ៕

• ជំនួញ
• ឡាន