សំណាងហើយ! អ្នកដំណើរបីនាក់ ជាប់លើកោះដាច់ស្រយាលជាងមួយខែ ប៉ុន្តែនៅរស់រានមានជីវិត ដោយការហូបរបស់ទាំងនេះ

បរទេស៖ ទីភ្នាក់ងារ​សារព័ត៌មាន CNN បានរាយការណ៍ថា ​ឆ្មាំឆ្នេរសមុទ្រសហរដ្ឋអាមេរិក បានជួយសង្គ្រោះ​ពលរដ្ឋគុយបាចំនួន ៣នាក់ ​ដែលជាប់នៅលើកោះដាច់​ឆ្ងាយសង្វែង បាហាមេន (Bahaman) ​អស់រយៈពេល ៣៣ថ្ងៃ ប៉ុន្តែជាសំណាង ពួកគេអាចនៅមានជីវិត​ដោយការបរិភោគ ដូង ខ្យង និងសត្វកណ្តុរ។

ពលរដ្ឋគុយបា រួមមានបុរសពីរនាក់ និងស្ត្រី​ម្នាក់ ​​ត្រូវបានជួយសង្គ្រោះបន្ទាប់ពី​ពួកគេ​ព្យាយាមគ្រវីទង់ ដើម្បី​បង្ហាញជាសញ្ញាដល់​ឆ្មាំ​សមុទ្រអាមេរិក ដែលបានបើកឧទ្ធម្ភាគចក្រឆ្លងកាត់តំបន់​ខាងលើ។ ​ ទន្ទឹមនឹងនោះ ឆ្មាំសមុទ្របានទម្លាក់វិទ្យុទាក់ទង ស្បៀងអាហារ និងទឹកដល់អ្នកទាំងបីកាលពីថ្ងៃច័ន្ទ ហើយត្រឡប់មកជួយសង្គ្រោះពួកគេចេញពីកោះ​នៅថ្ងៃអង្គារ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក Brandon Murray មន្ត្រីឆ្មាំឆ្នេរសមុទ្រអាមេរិកបាន​គូសបញ្ជាក់ថា ទូករបស់ពលរដ្ឋគុយបាទាំងបីនាក់ គឺបានក្រឡាប់​លិចនៅក្នុងសមុទ្រ ហើយពួកគេ​តស៊ូហែលទឹក​រហូតមកដល់កោះ បាហាមេន ដែលស្ថិតនៅចន្លោះទីក្រុងវ៉េសឃី ​និងប្រទេសគុយបា។ យ៉ាងណាមិញ ​គេក៏នៅមិនទាន់ដឹងច្បាស់នៅឡើយទេ ថាតើពួកគេជាជនចំណាកស្រុក ដែលប៉ុនប៉ងធ្វើដំណើរទៅកាន់​ទឹកដីអាមេរិក ឬយ៉ាងណា។

គួរជម្រាបដែរថា អ្នកទាំងបីនាក់នេះ​ គឺមិន​មានទទួលរងរបួសធ្ងន់ធ្ងរអ្វីនោះទេ ហើយបច្ចុប្បន្ន ពួកគេត្រូវ​បានបញ្ជូនទៅ​មជ្ឈមណ្ឌលវេជ្ជសាស្ត្រ Lower Keys ដើម្បីពិនិត្យសុខភាព៕