អាចម៍ផ្កាយដ៏ធំ ទំហំដល់ទៅពីរដងនៃអគារ Burj Khalifa ដែលខ្ពស់ជាងគេបំផុតលើលោក នឹងហោះមកកៀកផែនដីនៅខែក្រោយ

បរទេស៖ អាចម៍ផ្កាយដែលមានទំហំធំទ្វេដងនៃទំហំអាគារខ្ពស់បំផុតរបស់ពិភពលោក នឹងហោះឆ្លងកាត់ផែនដីនៅខែមីនា ហើយត្រូវបានអង្គការណាសាចាត់ទុកថាជា អាចម៍ផ្កាយដែលអាចបង្កគ្រោះថ្នាក់បាន។ 

អាចម៍ផ្កាយដែលមានឈ្មោះថា 231937 (2001 FO32) ទំនងជាមិនហោះមកបុកនឹងផែនដីនោះទេ ព្រោះវានឹងស្ថិតនៅចម្ងាយ 1.2លានម៉ាយល៍ (ប្រហែល2លានគីឡូម៉ែត្រ) ពីភពផែនដី ពោលគឺឆ្ងាយជាងព្រះចន្ទ5ដងឯណោះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ទោះយ៉ាងណាក៏ដោយ អង្គការណាសាបានចាត់ទុកវត្ថុអវកាសណាដែលមកកៀកផែនដីក្នុងចម្ងាយ 93លានម៉ាយល៍ (150លាន km) ថាជា វត្ថុស្ថិតនៅជិតផែនដី (Near Earth Object) ដែលជាចម្ងាយ3ភាគ4នៃចម្ងាយ 120លានម៉ាយល៍ (200លាន km) ទៅភពព្រះអង្គារ។

អាចម៍ផ្កាយដែលមានគ្រោះថ្នាក់នេះ នឹងហោះមកជិតផែនដីនៅម៉ោង 16:03 GMT (11:03យប់ នៅកម្ពុជា) ថ្ងៃទី21 ខែមីនា។ អាចម៍ផ្កាយនេះត្រូវបានគេចាត់ទុកថាមានគ្រោះថ្នាក់ ដោយសារវាអាចនឹងបុកភពណាមួយនៅថ្ងៃអនាគតនៃប្រព័ន្ធព្រះអាទិត្យ។

អាចម៍ផ្កាយ231937គឺជាផ្ទាំងថ្មអវកាសធំបំផុតដែលត្រូវចូលមកជិតផែនដីនៅឆ្នាំនេះ ហើយមានទំហំ1.7គីឡូម៉ែត្រ ដែលធំជាងទ្វេដងនៃអគារខ្ពស់បំផុតនៅលើផែនដី គឺអាគារ Burj Khalifa។

គេអាចមើលឃើញអាចម៍ផ្កាយនេះតាមរយៈតេឡេទស្សន៍ 8អ៊ីញ (eight inch aperture) បន្ទាប់ពីថ្ងៃលិចនៅថ្ងៃទី21 ខែមីនា ដោយក្រឡេកមើលទៅទិសខាងត្បូង។  

អង្គការណាសាបានតាមដានយ៉ាងយកចិត្តទុកដាក់ ចំពោះអាចម៍ផ្កាយណាដែលមកជិតផែនដីទាំងអស់ ដើម្បីកំណត់ថាតើអាចម៍ផ្កាយណាមួយអាចចូលមកបុកផែនដីបាន៕

• វិទ្យាសាស្រ្ត
• ធម្មជាតិ