ក្រុមហ៊ុន Apple ត្រូវបានគេរាយការណ៍ថា បានជួបចរចារជាមួយ Nissan អំពីការផលិតរថយន្ត Apple Car

បរទេស៖ បន្ទាប់ពីការបែកបាក់រវាងក្រុមហ៊ុន Hyundai ​និង Apple លើការចរចារភាពជាដៃគូផលិតរថយន្តអេឡិចត្រូនិចដែលបើកបរដោយខ្លួនឯង Apple បានងាកទៅចរចារជាមួយក្រុមហ៊ុនផលិតរថយន្តដទៃទៀត មួយក្នុងចំណោមនោះត្រូវបានគេរាយការណ៍ថាជាក្រុមហ៊ុន Nissan ដែលបានជួបពិភាក្សាជាមួយក្រុមហ៊ុន Apple នៅក្នុងប៉ុន្មានខែថ្មីៗនេះ នេះបើយោងតាមសារព័ត៌មាន Financial Times។ ទោះយ៉ាងណាក៏ដោយ របាយការណ៍បាននិយាយថាការពិភាក្សានោះមិនបន្តសកម្មភាពទៀតទេ។

នៅក្នុងសេចក្តីថ្លែងការណ៍មួយទៅកាន់ Reuters​ ក្រុមហ៊ុន Nissan បាននិយាយថា «យើងមិនបានពិភាក្សាជាមួយ Apple ទេ» ការនិយាយបែបនេះបញ្ជាក់ថាប្រសិនបើការពិភាក្សាណាមួយបានកើតឡើងនោះ វាត្រូវបានបញ្ឈប់រួចទៅហើយ។ អ្នកនាំពាក្យក្រុមហ៊ុន Nissan បានបន្ថែមថា «ទោះបីជាយ៉ាងណា ក្រុមហ៊ុន Nissan តែងតែបើកទូលាយដើម្បីស្វែងរកការសហការ និងភាពជាដៃគូដើម្បីពន្លឿនការផ្លាស់ប្តូរឧស្សាហកម្ម។»

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមសារព័ត៌មាន Financial Times កិច្ចពិភាក្សានេះមានរយៈពេលខ្លី ហើយមិនបានឈានដល់ថ្នាក់ដឹកនាំជាន់ខ្ពស់ទេ។ បញ្ហាដោយសារ​តម្រូវការរបស់ក្រុមហ៊ុន Apple ដែលចង់ឱ្យក្រុមហ៊ុន Nissan ផលិតរថយន្ដតែដាក់មានផ្លាកយីហោ Apple។ COO របស់ Nissan លោក Ashwani Gupta មិនបានបញ្ជាក់ថាបានជួបជាមួយ Apple នោះឡើយ តែនិយាយថា ក្រុមហ៊ុននឹងមិនផ្លាស់ប្តូររបៀបដែលខ្លួនផលិតឡាននោះឡើយ ការរចនា ការផលិត គឺនៅក្រោមប្រេន Nissan ទាំងអស់។

ពាក្យចចាមអារ៉ាមអំពីរថយន្ត Apple car បានលេចឡើងហួសប្រមាណ ចាប់តាំងពីក្រុមហ៊ុន ​Hyundai បានបញ្ជាក់ថាខ្លួនកំពុងនិយាយជាមួយក្រុមហ៊ុន Apple តែបន្ទាប់មកការចរចារនេះក៏ត្រូវបានបញ្ចប់វិញ។ ជំនួសឱ្យការក្លាយជាក្រុមហ៊ុនផលិតរថយន្តដោយខ្លួនឯងផ្ទាល់ ក្រុមហ៊ុន Apple ត្រូវបានគេរាយការណ៍ថាចង់បានក្រុមហ៊ុនផលិតរថយន្តមួយដើម្បីផលិតរថយន្តអគ្គីសនី ចំណែក​ Apple ផ្ទាល់នឹងផលិតបច្ចេកវិទ្យា hardware ​និង software។ ក្រុមហ៊ុនបានជួបចរចារជាមួយក្រុមហ៊ុនផលិតរថយន្តជាច្រើនអំពីគម្រោងនេះ៕

• វិទ្យាសាស្រ្ត
• ជំនួញ
• ឡាន