ភ្នំពេញ៖ កាលពីពេលថ្មីៗនេះ កម្មវិធីប្រកួតជ្រើសរើសធីតាឯកសង្ក្រាន្តរដូវកាលទី២ បានស្វែងរកនូវសមាសភាពបេក្ខនារីទាំង១៤ រូបជាផ្លូវការ បន្ទាប់ពីបានធ្វើការប្រកួតជម្រុះឆ្លងកាត់ជាច្រើនវគ្គកន្លងមក ដែលកម្មវិធីនេះបានប្រព្រឹត្តធ្វើឡើងនៅស្ថានីយ៍ទូរទស្សជាតិកម្ពុជា ដោយមានការរៀបចំឡើងដោយក្រុមហ៊ុន ហ្វាន់ អេនធើធិនម៉ិន (FUN Entertainment) និង មានការគាំទ្រ ចូលរួមសហការណ៍ពីក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងទូរទស្សន៍ជាតិកម្ពុជាផងដែរ។
![](https://s9.kh1.co/3f/3f2bc9ff6871776660a02e8e531754ed77b3c6b4.png)
![](https://s9.kh1.co/0f/0f2b84f623ef85b2e68ea93eaaeed4e2e783e6fc.png)
តាមការឲ្យដឹងពី អ្នកនាង សំណាង ពុទ្ធានី អ្នកតំណាងឲ្យក្រុមហ៊ុន ហ្វាន់ អេនធើធិនម៉ិន (FUN Entertainment) លើកឡើងថា បេក្ខនារីទាំង១៤រូប ដែលបានប្រកាសជាផ្លូវការក្នុងកម្មវិធីប្រកួតជ្រើសរើស «ធីតាឯកសង្ក្រាន្ត» រដូវកាលទី២នេះ គឺសុទ្ធសឹងជាសុភាពនារី ដែលមានសមត្ថភាព ទេពកោសល្យ និងមានសម្រស់ស្រស់ស្អាតពីធម្មជាតិ រួមទាំងមានចំណេះដឹងជ្រៅជ្រះ ទាំងភាសារជាតិ អន្តរជាតិ និងជំនាញសិល្បៈខុសគ្នារៀងៗខ្លួន ក៏ដូចជាយល់ដឹងច្បាស់ពី ពីវប្បធម៌ អរិយធម៌ខ្មែរដែលទាក់ទងនឹងពិធីបុណ្យចូលឆ្នាំប្រពៃណីខ្មែរជាតិយើងបានយ៉ាងច្បាស់ផងដែរ។
![](https://s9.kh1.co/ab/ab37d9288dd443e6b42c25f0bf8f87ae0d392f18.jpg)
អ្នកនាងបានបន្តឲ្យដឹងថា កម្មវិធីប្រកួត «ធីតាឯកសង្រ្កាន្ត» ក្នុងឆ្នាំនេះ មានសកម្មភាពដ៏ពិសេសម្យ៉ាងគឺ ការហ្វឹកហាត់រាំរបាំប្រពៃណីខ្មែរ ដែលត្រូវតម្រូវឲ្យបេក្ខនារីទាំង១៤ រូបយកចិត្តទុកដាក់ និងពង្រឹងសមត្ថភាពប្រកួតប្រជែងឲ្យកាន់តែខ្លាំងក្លាដើម្បីឈានទៅកាន់វគ្គផ្តាច់ព្រ័ត្រ និងទទួលបាននូវជ័យលាភី។ ក្រៅពីនេះ បេក្ខនារីទាំងអស់ក៏បានចូលរួមក្នុងសកម្មភាពជាច្រើនដូចជា ការថតរូបផ្លូវការ ដំណើរកម្សាន្ត និងការបង្ហាញសមត្ថភាពពិសេសរបស់ខ្លួនជាដើម។
![](https://s9.kh1.co/66/6699ed2a69ce30960e23ede3d3877ed4e27f199e.jpg)
គួររំលឹកផងដែរថា សម្រាប់ការប្រកួតជ្រើសរើសធីតាឯកសង្ក្រាន្ត មានអ្នកដាក់ពាក្យប្រមាណជាង២០០នាក់ ប៉ុន្តែមានតែ១៤នាក់ប៉ុណ្ណោះ ដែលត្រូវជាប់ជាបេក្ខនារីផ្លូវការរបស់កម្មវិធីនេះ។
សម្រាប់វគ្គផ្តាច់ព្រ័ត្រ ម្ចាស់ជ័យលាភីទាំង ៧នាក់ ទទួលបានឳកាសជ្រើសរើសក្នុងការថតសម្តែងជាតួអង្គទេពធីតាទាំង ៧អង្គ របស់កបិលមហាព្រហ្មសម្រាប់ចាក់ផ្សាយក្នុងស្ថានីយ៏ទូរទស្សន៍ជាតិកម្ពុជា ក្នុងថ្ងៃបុណ្យចូលឆ្នាំខ្មែរដែលនឹងចូលមកដល់ក្នុងពេលឆាប់ៗខាងមុខនេះផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]