ហេតុផលនឹកស្មានមិនដល់នៅពីក្រោយ ការជាប់ធ្វើចត្តាឡីស័ករបស់អវកាសយានិក ក្នុងឆ្នាំ១៩៦៩ បន្ទាប់ពីឡើងទៅឋានព្រះចន្ទ

អាមេរិក៖ ត្រឹមតែប៉ុន្មានសប្ដាហ៍បន្ទាប់ពីក្លាយជាមនុស្សដំបូងគេ ដែលដើរនៅលើឋានព្រះចន្ទ អវកាសយានិករបស់អង្គការណាសា លោក Neil Armstrong បានប្រារព្ធពិធីខួបកំណើតគម្រប់៣៩ឆ្នាំរបស់គាត់ នៅកន្លែងធ្វើចត្តាឡីស័ក។ លោក Armstrong ក៏មិនរំពឹងថា នឹងមានពិធីខួបកំណើតនៅថ្ងៃទី៥ ខែសីហានោះទេ។ រូបលោករួមជាមួយមិត្តរួមក្រុមអវកាសយានិក លោក Michael Collins និង Edwin "Buzz" Aldrin បានចំណាយពេល២១ថ្ងៃក្នុងការធ្វើចត្តាឡីស័ក បន្ទាប់ពីបេសកកម្មជាប្រវត្តិសាស្ត្ររបស់ពួកគាត់ទៅកាន់ឋានព្រះចន្ទ បណ្ដាលមកពីការប៉ះពាល់ជាមួយអង្គធាតុដែលមាននៅលើឋានព្រះចន្ទ។

មូលហេតុនៃការប្រុងប្រយ័ត្ននោះ គឺមានពីរ។ អវកាសយានិកអាចត្រូវបានប៉ះពាល់នឹងបាក់តេរីគ្រោះថ្នាក់ ឬធាតុដែលមិនស្គាល់ផ្សេងទៀត។ បេសកកម្មនេះគឺជាលើកទីមួយ ដែលមនុស្សបានធ្វើអន្តរកម្មជាមួយផ្ទៃ នៅលើទីតាំងខាងក្រៅភពផែនដី។ ក្រុមគ្រូពេទ្យបានឃ្លាំមើលយ៉ាងហ្មត់ចត់ទៅលើអវកាសយានិក ខណៈក្រុមការងារនៅដាច់ដោយឡែកមួយទៀត ត្រូវបានធ្វើតេស្ដនិងសិក្សាអំពីថ្មនិងធូលីដែលបាននាំយកពីឋានព្រះចន្ទ ដោយអវកាសយានិក។ មិនតែប៉ុណ្ណោះ គេមានគោលបំណងរក្សាការពារសរីរាង្គមានជីវិតណាមួយ ដែលអាចពាំនាំពីឋានព្រះចន្ទ នៅក្នុងសំណាកផ្សេងៗ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការធ្វើចត្តាឡីស័ករយៈពេល២១ថ្ងៃរបស់អវកាសយានិក ត្រូវបានចាប់ផ្ដើមជាផ្លូវការ នៅពេលគម្របយានចុះចត Eagle lunar lander ត្រូវបានបិទ នៅថ្ងៃទី២១ ខែកក្កដា មុនលោក Aldrin និង Armstrong មកជុំគ្នាជាមួយលោក Collins នៅក្នុងម៉ូឌុល Columbia ផ្នែករបស់យាន ដែលនឹងហោះជុំវិញឋានព្រះចន្ទ និងចាប់ផ្ដើមធ្វើដំណើររយៈពេល៣ថ្ងៃ ត្រឡប់មកកាន់ផែនដីវិញ។

វិធានការទប់ស្កាត់នៃការចម្លងរោគពេលត្រឡប់មកវិញ ឬការពាំនាំយកបាក់តេរីឬភ្នាក់ងារបង្ករោគនានាដែលមិនចង់បាន ពីឋានព្រះចន្ទ គឺជាក្ដីកង្វល់ដ៏ធំ ហើយការគិតគូរត្រូវបានធ្វើឡើងគ្រប់ដំណាក់កាលនៃបេសកកម្មអាប៉ូឡូ១១។ ការទុកដាក់អង្គធាតុពីឋានព្រះចន្ទត្រូវបានធ្វើឡើងយ៉ាងហ្មត់ចត់ ប៉ុន្តែក៏ត្រូវការពារវាពីផលប៉ះពាល់ដល់បរិស្ថាន នៅលើផែនដីដែរ។ សំណាកពីឋានព្រះចន្ទត្រូវបានរុំខ្ចប់ ហើយអវកាសយានិកត្រូវធ្វើចត្តាឡីស័ករយៈពេល២១ថ្ងៃ ដោយផ្អែកលើការយល់ដឹងពីរយៈពេលដែលរោគសញ្ញាអាចនឹងលេចឡើង នៅពេលមនុស្សជាប់ពាក់ព័ន្ធជាមួយនឹងមេរោគ៕

• វិទ្យាសាស្រ្ត