បរទេស៖ ប្រទេសរុស្ស៊ីនិងចិនគ្រោងនឹងធ្វើការរួមគ្នា ដើម្បីសាងសង់ស្ថានីយស្រាវជ្រាវមួយនៅលើឋានព្រះចន្ទ។ យោងទៅតាម Ars Technica បានឱ្យដឹងថា ប្រទេសទាំងពីរបាននិយាយថា ពួកគេនឹងសហការគ្នាលើគម្រោង International Lunar Science Station។ មិនទាន់មានព័ត៌មានលម្អិតអំពីគម្រោងនេះនៅឡើយទេ ប៉ុន្តែទីភ្នាក់ងារអវកាសជាតិ Roscosmos របស់ប្រទេសរុស្ស៊ីបានលើកឡើងថា ស្ថានីយនេះអាចមានទីតាំងទាំងក្នុងគន្លងជុំវិញព្រះចន្ទ និងលើផ្ទៃរបស់វា។ វាក៏នឹងត្រូវបានបើកចំហ សម្រាប់ប្រជាជាតិដទៃផ្សេងទៀតដើម្បីចូលរួមផងដែរ។
ប្រទេសចិននិងរុស្ស៊ីគឺជាប្រទេសពីរ ដែលមិនមានឈ្មោះក្នុងកិច្ចព្រមព្រៀងគម្រោង Artemis របស់អង្គការណាសា។ ប្រកាសនៅក្នុងខែតុលា កិច្ចព្រមព្រៀងនេះស្វែងរកការបង្កើតគំរូសម្រាប់ការរុករកដោយសន្តិភាព សហប្រតិបត្តិការនិងតម្លាភាពនៅលើឋានព្រះចន្ទ។ លោក Dmitry Rogozin ប្រធាន Roscosmos បាននិយាយថា Lunar Gateway ដែលជាស្ថានីយអវកាសដែលណាសាមានគម្រោងសាងសង់នៅលើគន្លងជុំវិញព្រះចន្ទ និងជាផ្នែកមួយនៃ Project Artemis នោះគឺផ្តោតលើអាមេរិកខ្លាំងពេក។
ទោះបីជាអង្គការណាសា និង Roscosmos បានសហការគ្នាអស់រយៈពេលជាច្រើនទស្សវត្សលើស្ថានីយអវកាសអន្តរជាតិ ISS និងមានកិច្ចព្រមព្រៀងដូចគ្នាដែលធ្វើឱ្យ ISS អាចធ្វើទៅបានក៏ដោយ ក៏រុស្សុីមិនបានចាប់ដៃគូជាមួយណាសាដែរ។ ក្រោយមកលោក Rogozin បានបើកចំហលទ្ធភាពដែលអាចឱ្យទីភ្នាក់ងារអវកាសទាំងពីរ Roscosmos និងណាសា ធ្វើការជាមួយគ្នាម្តងទៀត ប៉ុន្តែឥឡូវ Roscosmos បានចាប់ដៃគូជាមួយប្រទេសចិនទៅហើយ ដូច្នេះឱកាសនៃការចាប់ដៃគ្នារវាងទីភ្នាក់ងារអវកាសទាំងពីរនេះ ហាក់ដូចជាមិនទំនងនឹងកើតឡើងនោះទេ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
